Ońtústikqazaqstandyq jaýyngerdiń jerlengen jeri 74 jyldan keıin tabyldy
Ońtústik Qazaqstannan maıdan dalasyna 140 myńnan astam adam attanǵan. Olardyń 60 myńǵa jýyǵy týǵan jerine oralmady. Sonyń biri - Mańqara Jumabekov bolatyn. Qatardaǵy sarbaz 39 jasynda maıdan dalasyna attanyp, Mánshúk Mámetovamen bir polkte soǵysqan. Qatardaǵy jaýynger 1943 jyly Reseıdiń Pskov oblysynda bolǵan qandy shaıqasta erlikpen qaza taýypty. Biraq, alasapyranda jaýynger Jumabekov jerlengen jer umyt qalyp, tek bıyl ǵana belgili boldy.
«Osy ǵalamtordyń damýynyń arqasynda taptyq. Atamnyń famılııasy Jumabekov qoı, aldyna «D» qoıylyp ketken eken. Bir shóbere inim Djýmabekov dep ınternetke kirip, tapty ǵoı. Sóıtip sol jaqpen habarlasyp edik, rasymen de bizdiń atamyz sol jaqqa jerlegen bolyp shyqty. Ol jaqqa baryp qaıttyq. Endi naǵyz soǵystyń qaınaǵan jeri eken. Reseı azamattary jaqsy kútip alyp, bárin kórsetti», - deıdi jaýyngerdiń nemeresi Habıbolla Júzbaev.
Pskov oblysynyń Baýyrlastar zıratynan ákelingen bir ýys topyraq týǵan jerine qoıyldy. Urpaqtary, týystary as berip, rýhyna quran baǵyshtady.
Aıta keteıik, Mańqara Jumabekov maıdan dalasyna attanǵanda artynda 4 uly qalǵan eken. Úlkeni altyda, al, kenje uly Álaıdar Jumabekov ana qursaǵynda bolǵan. Sondyqtan ol áke júzin kórmegen. Dese de ákesinen bir habardy 74 jyl kútipti. Sol arada úsh baýyry men anasyn jerge tapsyrǵan. Soǵys qasiretin tartqan perzent bolyp, jalǵyz qalsa da, áke atynyń óshpegenine razy.
«Kishkentaı kezimizde 18-19 jasqa kelgenshe keledi dep kúttik qoı. 18-19-dan keıin kúder úze bastadyq. Biraq, izdeýdi toqtatpadyq. Armanymnyń bireýi sol edi. Tabyldy, shúkirshilik etemin», - deıdi Álaıdar Jumabekov.
