Ońtústikqazaqstandyq sportshy gir tasyn kóterýden álem chempıony atandy
ShYMKENT. QazAqparat - Ońtústik Qazaqstan oblysynyń sportshysy 19 jastaǵy Qobylandy Orynbasarov Seýlde ótken gir tasyn kóterý sportynan álem chempıony atandy. Al, jattyqtyrýshysy Murat Serikbaev ardagerler arasyndaǵy jarysta álem chempıonatynyń kúmis júldesin ıelendi, dep habarlaıdy QazAqparat tilshisi.
Ońtústik Koreıanyń astanasy Seýl qalasynda qarasha aıynyń 15-19 aralyǵynda ótken jarysqa álemniń 33 elinen 600-ge jýyq sportshy qatysqan bolatyn. Dodada 73 keli salmaq dárejesinde baq synaǵan Qobylandy, 32 keli gir tasyn uzyn tsıkldy kóterýdi 62 ret baǵyndyrǵan. Jattyqtyrýshysy Murat Serikbaevtyń aıtýynsha, Qobylandy alǵashqyda qazaq kúresimen aınalysqan eken.
«2014 - 2015 jyldar aralyǵynda Qobylandyǵa gir tasyn kóterýdiń qyr-syryn úırettim. Az ýaqytta úlken nátıjeler kórsete bastady. Máselen, osy sportpen aınalysqan bir jyldyń ishinde jasóspirimder arasynda Qazaqstan Respýblıkasynyń chempıony, sol jyly Latvııada ótken Eýropa chempıontynda kúmis júldege qol jetkizgen. Al, keler jyly Aqtóbe qalasynda jasóspirimder arasynda álem chempıony atandy. Bıyl jastar arasyna da erkin kirip, el birinshiligin utty. Ózderińiz kýá bolyp otyrǵandaı, jastar arasyndaǵy ulttyq quramaǵa múshe bolyp, Ońtústik Koreıa memleketinde ótken álem chempıonatynyń jeńimpazy boldy»,- deıdi bapker Murat Serikbaev.
Al, bapkerdiń ózi bolsa 73 keli salmaq dárejesinde 24 kelini qossaıys boıynsha 131 ret kóterip kúmis júldeni alyp otyr.
Aıta keteıik, jasóspirimder arasyndaǵy álem chempıony Sozaq sportynyń tól týmasy. Ońtústikten shyqqan jastar arasyndaǵy tuńǵysh álem chempıony Almaty qalasyndaǵy Qazaq týrızım jáne sport akademııasynyń 3 kýrs stýdenti.
