Ońtústikqazaqstandyq kásipker 40 oqýshyny EXPO kórmesine tegin ákeledi

ASTANA. QazAqparat - Belgili kásipker, fılantrop, «Qurmet» ordeniniń ıegeri Oralbek Botpaı elordalyq 10 oqýshy men ózi týyp-ósken Báıdibek aýdanynyń 30 oqýshysyn EXPO-2017 kórmesine tegin ákeledi. Bul týraly búgin Qazmedıa ortalyǵynda O.Botbaıdyń ózi málim etti, dep habarlaıdy QazAqparat.

«Bıyl el tarıhy úshin asa mańyzdy jyl boldy. Memleket basshysy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» Joldaýyn jarııalap, ekonomıkanyń álemdik ósiminiń ortadan joǵary qarqynyn qamtý kerek dedi. Bul maqsatqa qol jetkizýde kásipkerlerdiń qosar úlesi zor. Memleket basshysy óziniń «Bolashaqqa baǵdar: rýhanı jańǵyrý» atty maqalasynda da, keshegi Assambleıa sessııasynda da kásipkerlerdi týǵan jerge qaraılasýǵa shaqyrdy», - dedi kásipker.

Aıta keteıik, Elbasy Nursultan Nazarbaev óziniń «Bolashaqqa baǵdar: rýhanı jańǵyrý» maqalasynda: «Basqa aımaqtarǵa kóship ketse de týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp, qoldaý kerek. Bul - qalypty jáne shynaıy patrıottyq sezim, ol árkimde bolýy múmkin. Oǵan tyıym salmaı, kerisinshe, yntalandyrý kerek», dep jazǵan edi.

Osyǵan oraı,Oralbek Botbaı Astanada ótetin «EKSPO-2017» kórmesi men Elbasy maqalasyndaǵy «Týǵan jer» baǵdarlamasyn júzege asyrý usynysyna qoldaý kórsetý maqsatynda ózi týyp-ósken Báıdibek aýdanynyń 30 ozat oqýshysyna jáne Astanada oqıtyn 10 oqýshyǵa EKSPO-2017 kórmesine bılet syılaıtynyn málimdedi. Olardyń jol shyǵyny men jatyn ornyna da qarajat bólý qarastyrylǵan. Sonymen qatar, O.Botbaı Qazaqstan JOO-larynda oqıtyn stýdentterdi de nazardan tys qaldyrmady.

«Elimizdegi orta jáne shaǵyn kásip ókili retinde ári  50 jasqa tolýyma oraı, elimizdiń joǵary oqý oryndarynda bilim alyp jatqan 10 stýdentke 1 jyldyq shákirtaqy berip, Astanadaǵy «Turan» kolledjiniń 5 talapkerine tolyq grant taǵaıyndaýdy uıǵardym»,- dedi O.Botbaı.