Ońtústikqazaqstandyq bala oqıǵasy: Zaǵıpa Bálıeva óz pikirin bildirdi
ASTANA. QazAqparat - Qazaqstandaǵy Bala quqyqtary jónindegi ýákil Zaǵıpa Bálıeva 7 jastaǵy ońtústikqazaqstandyq balaǵa qatysty oqıǵa jóninde óz pikirin bildirdi. Balany keshqurym anasy Astanadaǵy «Asyl bala» respýblıkalyq qaýymdastyǵy ortalyǵynan alyp ketken bolatyn, dep habarlaıdy «QazAqparat» HAA.
«Bala quqyqtary jónindegi ýákil retinde bala anasymen qaýyshqanyna qýanyshtymyn. Men óz tarapymnan búldirshin memleket qorǵaýynda bolýy úshin bar kúshimdi saldym», - dedi Zaǵıpa Bálıeva agenttik tilshisine bildirgen pikirinde.
«Men jurttyń bárin sabyrly bolýǵa shaqyrdym. Bul prokýratýra jáne memorgan ókilderi kelgen soń ǵana sheshim qabyldaý úshin qajet boldy. Men anasyna balanyń tynyshtyǵy úshin kirgize almaıtynymdy, bárine sabyrǵa kelý kerek ekenin aıttym», - deıdi ol.
Qazaqstandaǵy Bala quqyqtary jónindegi ýákildiń aıtýynsha, bala ekinshi ret tekserýden ótýge daıyndalyp jatqan. Bul ońaı sharýa emes, sol úshin onymen psıhologtar jumys istep jatyr.
«Prokýratýra ókili de tańǵa deıin ortalyqta qalý jóninde ótinish bildirgen, alaıda anasy men balanyń zańdy qorǵaýshysy ony alyp ketti», - dedi Zaǵıpa Bálıeva.
Ol osy kezde bala ekinshi qabatta bolǵanyn, sol sebepti áńgimelerdi estimegenin jáne onyń quqyqtary taptalmaǵanyn aıta ketti. Osy oraıda ombýdsmen balanyń anasyna teris aqparat berilgen dep sanaıtynyn atap ótti.
«Endi anasy tolyqtaı balaǵa jaýapty. Men búldirshinge amandyq jáne januıasynyń qaıta qaýyshqanyn tileımin», - dedi ol.
«Ekinshi jaǵynan, aıyptalyp otyrǵan balalardyń da qorǵaýda bolý quqyǵy bar. Ekinshi tarap ta bári zańdy túrde jasalyp jatqanyna senimdi bolý úshin qos taraptyń da ókilderi, qorǵaýshylary kerek bul jerde», - dedi Zaǵıpa Bálıeva balaǵa Almatyda medıtsınalyq tekserý jasaý jóninde pikir bildire otyryp.
Bala quqyqtary jónindegi ýákildiń málimeti boıynsha, «Asyl bala» respýblıkalyq qaýymdastyǵy ortalyǵynan balany anasy alyp ketken, onda qazir búldirshinniń ájesi men tátesi ǵana qalǵan.
Qazaqstannyń Bala quqyqtary jónindegi ýákiliniń keńsesi balanyń anasymen kezdeskenin rastady. Bala advokattyń qatysýymen anasyna berildi.
Eske salaıyq, Saryaǵash aýdany Abaı aýylynda turatyn 7 jasar balanyń zorlanǵany týraly aqparat qoǵamda qyzý pikirtalas týǵyzdy. Balanyń ájesi quqyq qorǵaý organdaryna nemeresin joǵary synyp oqýshylary zorlap kelgenin aıtyp, aryzdanǵan. Qylmystyq is qozǵaldy.
Aıta ketý kerek, daýly jaǵdaıdan soń OQO ákimi Janseıit Túımebaev birqatar sheneýnikke sógis jarııalap, jumystarynan shettetti. Abaı men Saryaǵash eldi mekenderinde polıtsııa qyzmetkerleri qyzmetinen bosatyldy. Sondaı-aq, bul isti arnaıy prokýror óndiriske aldy.
