Ońtústikqazaqstandyq 20 dáriger Ońtústik Koreıada tájirıbe almasyp qaıtty
ShYMKENT. QazAqparat - Ońtústik Qazaqstan oblysynyń aýdandyq ortalyq aýrýhanalarynyń bas dárigerlerinen quralǵan 20 maman oblys ákiminiń qoldaýymen jáne densaýlyq saqtaý basqarmasynyń uıymdastyrýmen Ońtústik Koreıa respýblıkasyna baryp, tájirıbe almasyp qaıtty, dep habarlaıdy OQO ákiminiń baspasóz qyzmeti.
Ońtústik Koreıanyń úzdik klınıkalarynda tájirıbe almasyp qaıtqan birqatar aýdandyq aýrýhanalardyń bas dárigerleri osy sharaǵa baılanysty búgin Óńirlik kommýnıkatsııalar qyzmetinde brıfıng ótkizdi.
Spıkerlerdiń aıtýynsha, jumys saparynyń basty maqsaty - dúnıedegi aldyńǵy qatarly medıtsınasy damyǵan elderdiń biri sanalatyn Ońtústik Koreıa memleketiniń medıtsınalyq kómek kórsetý júıesiniń jumysymen tanysý. Brıfıngte óz oıymen bólisken Saryaǵash aýdandyq aýrýhanasynyń bas dərigeri, top jetekshisi Ibragım Tashev óńirden barǵan delegatsııalar kompıýterlik-aqparattyq júıeniń jumys tártibimen, medıtsıalyq saqtandyrý júıesiniń erekshelikterimen, ınsýlt alǵan naýkastarǵa kórsetiletin kómek, ınsýltan keıingi ońaltý jumystaryn uıymdastyrý máselelerimen tanysqanyn atap ótti.
«Biz eń aldymen 3 aýrýhanadan turatyn SEM medıtsınalyq klınıkasynyń jumysymen tanysýdan bastadyq. Gospıtalda medıtsınanyń barlyq salalary boıynsha bólimsheler bar, jáne olar kásibı mamandarmen, zamanaýı medıtsınalyq qural-jabdyqtarmen qamtamasyz etilgen. Sondaı-aq, zamanaýı talaptarǵa saı keletin emdeý keshenderi qataryna kiretin Adjý ýnıversıtettik klınıkasynyń jumysyn kórdik. Onda bar-joǵy 80 stýdent dáris alady. Klınıka ujymynyń aıtýynsha, bul úzdik medıtsınalyq mamandardy daıyndaýdyń kepili eken», - deıdi Ibragım Tashev.
Munymen qosa ońtústikqazaqstandyq 20 dáriger Kengıdo provıntsııasynyń vıtse-meri men densaýlyq saqtaý mınıstriniń qabyldaýynda boldy. Onda qos tarap provıntsııa medıtsına salasynyń jetistikteri men medıtsınalyq saqtandyrý júıesiniń jumysy jaıly sóz qozǵaǵan.
Baspasóz máslıhatynda sóz alǵan Shardara aýdandyq emhanasynyń bas dárigeri Janar Ospanova medıtsınalyq saqtandyrý júıesin endirýde elý jyldyq tájirıbesi bar Ońtústik Koreıanyń júıesin óńirimizde júzege asyrýǵa bolatynyn aıtty.
Arys aýdandyq ortalyq aýrýhanasynyń bas dárigeri Erǵalı Əlimbaevtyń aıtýynsha, Ońtústik Koreıada Seýl ýnıversıtettik aýrýhanasynan basqa barlyq gospıtaldar tolyǵymen jekemenshik eken. Ondaǵy medıtsınalyq kómektiń barlyǵy, onyń ishinde jedel járdem qyzmeti de aqyly túrde kórsetiledi. Al, saqtandyrý qoryna azamattar óziniń 20 paıyz tabysyn ótkizip otyrady. Sol sebepten, klınıkalardyń jańa qural saımandarmen jabdyqtalyp, patsıentterge zamanaýı úlgide dıagnostıkalyq jáne emdik kómek kórsetýine múmkindik bar.
Jalpy sapar qorytyndysymen dárigerler oblysta halyq arasynda sanıtarlyq aǵartý jumystaryn jandandyrý, BMSK deńgeıin kóterý, aýdandyq aýrýhanalarda ońaltý bólimshelerin ashý, ınsýlttiń aldyn alý jáne osy jumystarǵa qoǵamdyq uıymdar men ákimshilik qyzmetkerlerdi jumyldyrý boıynsha jumystardy damytý qajet dep túıgen.
Aıta keteıik, osy jyldyń sáýir aıynda Ońtústik Koreıanyń bir top úzdik dárigerleri Shymkentte elimizdiń ár óńirinen kelgen medıtsına mamandaryna master-klasstar ótkizip, dáris oqyp, tájirıbelerimen bólisken edi. Onda Ońtústik Koreıanyń aldyńǵy qatarly 4 klınıkasymen yntymaqtastyqty arttyrý maqsatynda Ońtústik Qazaqstan oblysynyń densaýlyq saqtaý basqarmasy men Koreıa Respýblıkasy densaýlyq saqtaý ındýstrııasyn damytý ınstıtýty (KHIDI) arasynda túzilgen yntymaqtastyq memorandýmyna qol qoıylǵan bolatyn.
