Ońtústik jurtshylyǵy elordalyqtarǵa dastarhan jaıdy
«Elbasynyń, memlekettiń qoldaýynyń arqasynda óńirimizde aýyl sharýashylyǵy óniminiń kólemi artyp keledi. Máselen, ótken jyly 480 mlrd teńgeniń ónimin alsaq, bıyl ony 523 mlrd teńgege jetkizemiz dep otyrmyz. Osy jyldyń 7 aıynda 187 mlrd teńgeniń ónimin óndirdik. Bul ótken jyldyń sáıkes kezeńimen salystyrǵanda 27 mlrd teńge artyq. Árıne, Elbasynyń tapsyrmasyna oraı óńirimizdiń eksporttyq áleýetin arttyryp, ımporttyq taýarlardy azaıtpaqpyz. Byltyr 247 mlrd teńgeniń ımport taýaryn alǵan edik. Al osy jyly onyń kólemin 209 mlrd teńgege deıin tómendetý josparymyzda bar», - dedi shara aıasynda suhbat bergen Ońtústik Qazaqstan oblystyq aýyl sharýashylyǵy basqarmasy bastyǵynyń mindetin atqarýshy Turǵanbek Ospanov. 
Sonymen qatar ol Qurban aıt meıramyna oraı Ońtústik Qazaqstan oblysy tapsyrmasymen elordanyń jetim balalar, qarttar úılerine jáne áleýmettik jaǵynan az qamtamasyz etilgen 200 otbasyǵa sıyr etin taratyp bergenin aıtty. Al búgin 1 sıyr men birneshe qoıdy qurbandyqqa shalǵan.
Aıta keteıik, etnoaýylda Shámshi Qaldaıaqov atyndaǵy oblystyq fılarmonııanyń qazaq ult-aspaptar orkestriniń kontserti kúndelikti ótýde. Mádenı shara shertpe kúıdiń sheberleri Súgir Áliuly, Tólegen Mombekov syndy birqatar Ońtústikten shyqqan kúıshilerdiń kúılerimen jalǵasady.
Súgir atyndaǵy qazaq ult-aspaptar orkestri 2002 jyly qurylsa, 2009 jyly belgili kúıshi Súgir Áliulynyń esimi berilgen. Búgingi tańda orkestrge Ómirbek Qonysbekov jetekshilik etedi. Bas dırıjeri - Erlan Dáýrenbekov.
