Ońtústik jáne Soltústik Koreıa tarıhı sammıtke daıyndalyp jatyr
SEÝL. QazAqparat - Ońtústik jáne Soltústik Koreıanyń resmı ókilderi osy aıdyń sońynda ótetin tarıhı sammıt qarsańynda eki memleket basshylarynyń telefon baılanysyn ornatý máselesin talqylady, dep habarlaıdy Renhap agenttigi.
Kelissózder Soltústik Koreıa aýmaǵynda ótti.
«Shuǵyl jeli» ashylǵan soń, Ońtústik Koreıa prezıdenti Mýn Chje In men Soltústik Koreıa basshysy Kım Chen Yn tikeleı 27 sáýirde ótetin sammıt qarsańynda telefon arqyly suhbattasady. Ol Ońtústik jáne Soltústik Koreıa arasyndaǵy úshinshi sammıt bolady.
Taraptar qaýipsizdik jáne BAQ máselelerin, sondaı-aq 18 sáýirdegi jeke kezdesý aıasyndaǵy hattamany talqylamaq. Kelesi aptada ótetin joǵary deńgeıli otyrysta aldaǵy sammıttiń kún tártibi belgilenedi.
Eske sala keteıik, Qazaqstandaǵy Koreıa Respýblıkasynyń Tótenshe jáne ókiletti elshisi Kım Desık osy sammıtke baılanysty Ońtústik Koreıa prezıdenti Mýn Chje Inniń Ortalyq Azııaǵa, sonyń ishinde Qazaqstanǵa sapary keıinge qaldyrylǵanyn jetkizgen bolatyn.
