Ońtústik jáne Soltústik Koreıa osy aptada joǵary deńgeıde kelissózder júrgizedi
SEÝL. QazAqparat - Osy aptada Ońtústik jáne Soltústik Koreıa arasynda ótetin joǵary deńgeıli kelissózderde eki el basshylarynyń 27 sáýirdegi tarıhı sammıtinde qol jetkizgen kelisimderin iske asyrý talqylanady, dep habarlaıdy Renhap agenttigi Ońtústik Koreıa Birigý mınıstrligine silteme jasap.
Buǵan deıin mınıstrlik apta basynda kezdesý ótkizý týraly usynys jasalǵanyn, biraq Phenıannan áli jaýap kelmegeni týraly málimdegen.
«Eki el arasyndaǵy keńester áli jalǵasyp jatyr. Kezdesý osy aptanyń ishinde ótedi dep kútip otyrmyz», - deıdi mınıstrliktiń resmı ókili Pek De Hen.
Kezdesýde basty nazar Ońtústik Koreıa prezıdenti Mýn Chje In men Soltústik Koreıa basshysy Kım Chen Yn 27 sáýir kúni Phanmýndjomda qol qoıǵan tarıhı deklaratsııanyń oryndalýyna baǵyttalǵan naqty qadamdardy talqylaýǵa aýdarylady.
Prezıdentter qol qoıǵan birlesken deklaratsııa eki taraptyń bir-birine baǵyttalǵan barsha qastyq áreketterdi toqtatýdy kózdeıdi. Qujatqa sáıkes, Soltústik Koreıanyń Keson qalasynda ekijaqty baılanys jónindegi keńse ashylady. Taraptar ekonomıkalyq yntymaqtastyqty qaıta jandandyrý múmkindikterin qaraýǵa ýáde etken.
Olar, sondaı-aq 15 tamyzda Azat etý kúnine oraı 1950-53 jyldardaǵy Koreıa soǵysy kezinde ajyrap ketken otbasylardy kezdestirýge kelisti.
