Ońtústik Sýdanda ushaq qulady, 20-dan astam adam qaza tapty
ASTANA. QazAqparat - Jeksenbi kúni Ońtústik Sýdanda Djýba halyqaralyq áýejaıynan aspanǵa kóterilgen ushaq apatqa ushyrady, dep habarlaıdy «QazAqparat» HAA Reuters agenttigine silteme jasap.
Ońtústik Sýdan aqparat mınıstri Taban Abel Agektiń málimdeýinshe, ushaq kólge qulaǵan. Saldarynan kem degende 20 adam opat boldy. «Kem degende 20 adam qaza taýyp, úsh adam aman qaldy», - dedi ol.
Aman qalǵandardyń biri - ıtalııalyq dárigerdiń jaǵdaıy aýyr. Qazir oǵan Iıroldaǵy aýrýhanada ota jasalýda.
Oqıǵaǵa kýá bolǵandardyń aıtýynsha, qaza tapqandardyń denesi sýdan shyǵaryldy. Habarlarǵa qaraǵanda, mert bolǵandardyń kem degende úsheýi - bala.
Ońtústik Sýdannyń Djýbadaǵy Azamattyq avıatsııa basqarmasynyń atqarýshy dırektory Devıd Sýbek qaıǵyly oqıǵany rastady. Alaıda qurbandardyń naqty sanyn aıta alǵan joq.
Sońǵy jyldary Ońtústik Sýdanda birneshe áýe apaty boldy. 2017 jyly aýa raıynyń qolaısyzdyǵynan shaǵyn ushaq qulap, tórt jolaýshy zardap shekti.
2015 jyly bortynda jolaýshylary bar reseılik júk tasymaldaýshy ushaq qulap, ondaǵan adam qaza tapqan bolatyn.
Illıýstratsııalyq foto
