«Ońtústik» óńirlik qolbasshylyǵynda úzdik serjanttar men sarbazdar anyqtaldy

ASTANA. QazAqparat - «Ońtústik» óńirlik qolbasshylyǵyndaǵy 21450 áskerı bóliminiń bazasynda óńirlik qolbasshylyqtyń úzdik serjanttary men sarbazdary ataǵyna baq synasý óz máresine jetti. Bul týraly Qorǵanys mınıstrliginiń baspasóz qyzmetinen habarlady.

Saıysqa áskerı bólimder men quramalarda qatardaǵy jaýynger jáne serjanttar quramynda qyzmet etip júrgen 107 áskerı qyzmetshi qatysty. Baıqaýdyń negizgi mindetteri men maqsattary «Ońtústik» óńirlik qolbasshylyǵy serjanttary men sarbazdarynyń áskerı-kásibı sheberlikterin jetildirý, ozyq úlgidegi tájirıbeni, jumys jasaý stıli men ádis-tásilderdi zerdeleý, biriktirý jáne taratý bolyp tabyldy. Odan basqa, konkýrs barysynda áskerı-kásibı turǵyda anaǵurlym daıyndalǵan serjanttar men qatardaǵy jaýyngerler aıqyndaldy.

Baıqaý quramyna «Daıarlyq», «Qaısar» áskerı-sporttyq saıysy, oq atý daıarlyǵy boıynsha «Mergen», jaýyngerlik mashınalardy júrgizý boıynsha «Tulpar», áskerı-medıtsınalyq daıyndyq boıynsha «Densaýlyq» jáne taǵy basqa kezeńder kirdi. Áskerı bólimder arasyndaǵy jalpy komandalyq esepte  oryndar kelesideı bólindi. 1-orynǵa - 35748 áskerı bólimi, 2-orynǵa - 21450 jáne 3-orynǵa 66597 áskerı bólimi qol jetkizdi.