«Ońtústik» óńirlik qolbasshylyǵy tehnıkalaryn qysqy rejımge aýystyrýda

TARAZ. QazAqparat – «Ońtústik» óńirlik qolbasshylyǵynyń bólimderinde qarý-jaraq pen áskerı tehnıkany paıdalanýdyń qysqy rejımine aýystyrý boıynsha jumystar tolyq júrgizilýde.

Oǵan motoatqyshtar, tank, artıllerııalyq bólimsheler jáne basqa da bólimder jumyldyrylǵan, - dep habarlaıdy QazAqparat tilshisi.

​Búginde áskerı qyzmetshilermen tehnıkalyq jumystar bastalar aldyndaǵy nusqaýlyq-ádistemelik sabaqtar ótkizilýde. Jeke quramǵa qaýipsizdik sharalarynyń talaptary, qyzmet kórsetý tártibi jáne qysqy jaǵdaıda tehnıkany paıdalaný erekshelikteri túsindirildi.

​Mamandardyń aıtýynsha, qysqy jáne jazǵy kezeńderde tehnıkany paıdalaný sharttary aıtarlyqtaı erekshelenedi, sondyqtan tehnıkany paıdalanýdyń jańa rejımine aýystyrýdyń barlyq uıymdastyrý máselelerin qarastyrý qajet.

​«Áskerı tehnıkany durys jaǵdaıda ustaý áskerı bólimderdiń jaýyngerlik daıyndyǵyn qamtamasyz etedi. Tehnıka aqaýsyz jaǵdaıda kez kelgen aýa-raıyna daıyn bolýy kerek. Sondyqtan qysqy paıdalaný rejımine kóshý jumystary qyzý júrgizilýde. Bul oraıda janar-jaǵar maı materıaldarynyń jazǵy sorttaryn qysqy túrine jáne tehnıkalyq buıymdardy, maı, aýa jáne otyn súzgilerin aýystyrý sharalary atqarylýda. Sondaı-aq retteý jumystary júzege asyryldy. Qajet bolǵan jaǵdaıda óz merzimin ótkergen toraptar men agregattardyń da jańasy qoıylatyn bolady. Budan basqa, jaýyngerlik mashınalardyń álsiz bólshekterin aýystyrý, qosalqy bólshekterdi, qural-saımandar men kerek-jaraqtardy tolyq jınaqtaý júrgiziledi»,-deıdi Ońtústik« óńirlik qolbasshylyǵynyń 85395 áskerı bólimi komandıriniń tehnıkalyq qamtamasyz etý jónindegi orynbasary, podpolkovnık Jarqyn Aqyshev.