Ońtústik óńirlerden soltústikke qonys aýdarǵandarǵa qandaı kómek jasalady
Bul týraly Úkimet úıinde ótken baspasóz máslıhatynda Eńbek jáne halyqty áleýmettik qorǵaý birinshi vıtse-mınıstri Erjan Jylqybaev málim etti, dep habarlaıdy QazAqparat tilishisi.
«Baǵdarlama aıasyndaǵy qanatqaqty joba turǵysynda 3 mlrd teńge Soltústik Qazaqstan oblysyna bólindi. Osy oraıda ońtústik oblystardan qonys aýdaratyndar úshin 428 jalǵa beriletin turǵyn úıdi salý eskerilgen», - dedi E. Jylqybaev.
Osy oraıda ol jumys kúshi artyq ońtústik óńirlerden qonys aýdaratyndarǵa qandaı kómek jasalatynyn aıtty.
«Birinshiden, qonys aýdarýǵa otbasynyń ár múshesine 88 myń teńge somasynda birjolǵy tólem qarastyrylǵan. Ekinshiden, baspanany jaldaý men kommýnaldyq qyzmetter tólemderine 30 AEK nemese bir otbasyǵa jyl boıynda aı saıyn 77 myń teńge eskerilgen», - dedi E. Jylqybaev.
Munymen qosa, bǵdarlamaǵa belsendi qatysyp júrgen jumys berýshiler úshin sýbsıdııa qarastyrylǵan.
Budan buryn habarlanǵandaı, jumys kúshi artyq ońtústik óńirlerden adamdardy soltústik oblystarǵa qonystandyrýǵa jumystaryna toqtalsa, bıyl jospar boıynsha 2 253 otbasyny nemese 10 myń adamdy kóshirý eskerilgen. Búginde 1 050 otbasy nemese 4 myń adam qonys aýdardy.
