Ońtústik óńirlerdegi shóleıtterde jasyl alqaptardy qurýdyń jańa tehnologııasy synalýda

ASTANA. QazAqparat - BUU Damý baǵdarlamasy aýmaqtardy avtonomdy rejimde sýmen qamtamasyz ete alatyn qudyqtardy burǵylaýdyń qanatqaqty jobasyn iske qosty. Bul týraly búgin Astanada «jasyl» tájirıbeler men tehnologııalardy qoldaný konferentsııasynda BUU DB-nyń turaqty damý jónindegi jobalar portfeliniń jetekshisi Rasýl Rahımov málim etti.

Bir shaǵyn qudyqtyń aınalysynda 1 gektar jerdi kógaldandandyrýǵa múmkindik týyndaıdy. Jalpy Qazaqstan boıynsha osyndaı úsh qudyq bar eken, olar «Altynemel» Ulttyq saıabaǵynda jáne Qyzylorda oblysynda ornalasqan.

«Osy rette joba aıasynda qudyq burǵylanyp, jel generatory men kún paneli ornatylady. Avtonomdy rejimde turǵyndar men mal sharýashylyǵyna sý resýrstary qoljetimdi bolady. Nátıjesinde, shóleıtti jerde shaǵyn jasyl alqaptar paıda bola bastaıdy. Bul joba arqyly biz birinshiden osy jumysty zerttep, jumsalatyn shyǵyndardy kóremiz, ekinshiden, atalǵan jaǵdaıda tehnologııalyq múmkindikterdi baıqaımyz», - R. Rahımov.

Onyń sózine qaraǵanda, bundaı jobalar eldi mekenderden sý tartýǵa jelini ótkizý úshin memlekettik bıýdjet qarjysyn únemdeýge jol ashady. Bul baǵytta alǵashqy jumystar iske asyrylǵandyqtan, aldaǵy ýaqytta osy tektes jobalar arta túsedi degen senim bar.  Qudyqty ornatý kezinde fermerler úshin negizgi qıyndyqtar burǵylaý jumystary kezinde týyndaıdy eken.

«Osy rette negizgi shyǵyndar bolady. Alaıda fermerler kooperatıvke jınalyp, úlken qudyqtardy jasaı alady. Bizde kún panelderin «Astana Solar» óndiredi, jel generatory qondyrǵysyn Qytaıdan satyp alady. Búginde bul jabdyqtar qoljetimdi», - dedi ol.