Ońtústik óńirden qonys aýdarǵan baǵban SQO-da qaýyn-qarbyz ósirdi
PETROPAVL. QazAqparat – Soltústik Qazaqstan oblysy Esil aýdanynyń turǵyny baqshasynda qaýyn-qarbyz ósirip, ónim alyp jatyr, dep habarlaıdy QazAqparat tilshisi.
SQO ıAvlenka eldi mekeniniń turǵyny Ǵanı Erdosov ońtústik óńirdiń týmasy.
Byltyr memlekettik baǵdarlama aıasynda qonys aýdardy. Túrkistan oblysynda ol 30 jylǵa jýyq baǵbandyqpen aınalysqan eken. Qaýyn-qarbyz
ósirýdi jetik meńgergen er adam endi sol bilimi men tájirıbesin jańa mekende qoldanbaq.
Jylý súıgish ósimdikter soltústik óńirdiń aýa raıynda ádette óse qoımasa da, bilikti maman oraıyn taýyp, bul jerde baǵbanshylyqty damytpaq.
«Baǵbanshylyqpen burynnan aınalysamyn. Ońtústikte meniń óz baqsham bolatyn. SQO-ǵa kelgennen keıin ózim biletin ispen aınalysýdy jón
sanadym. Maǵan bul jerde óte unaıdy, tamasha. Topyraǵy qunarly, biraq aýa raıy salqynyraq. Jaz ystyq bolǵan jaǵdaıda jaqsy ónim alýǵa bolady.
Bıyl aýdandyq ákimdik uıymdastyrǵan konkýrsqa qatysyp, 14 ga jerdi aldym. Kelesi jyly ol ýchaskege qaýyn-qarbyz egemin», - deıdi Ǵanı Erdosov.
Baǵbandyq – otbasylyq kásip. Baqshany kútip baptaýǵa Ǵanıge uldary kómektesedi. Ekeýi stýdent bolsa, ekeýi mektepte oqıdy. Áıeli – medbıke.
«Tamshylatyp sýarý ádisin qoldanǵan jón. Ol úshin uńǵyma qazdyramyn.
Qarbyzdy 10 kúnde bir ret, biraq shóli qanǵansha sýarý qajet. Bir túpke orta eseppen 5-7 lıtr sý kerek. Asa kútimdi de qajet etpeıdi. Bıyl bul jaqta birinshe ret ekkendikten qarbyzdyń «golland» surypy jáne «túrikmen» qaýynyn tańdadym. Olar osyndaı aýa raıyna beıimdelgen, jaqsy jetiledi», - deıdi Ǵanı Erdosov.
Baǵbannyń aıtýynsha, Soltústik Qazaqstanda da qarbyz ben qaýynnan jaqsy ónim alýǵa bolady. Biraq ol úshin qajetti tehnologııany saqtaǵan jón. ıAǵnı
aýa raıyna beıimdelgen surypty tańdap, durys sýaryp, topyraqty mezgilinde mıneraldy tyńaıtqyshtarmen baıytyp otyrý kerek.
