Ońtústik óńirde ashyq aýa raıy saqtalady - Qazgıdromet
ASTANA. QazAqparat - 27 mamyr kúni elimizdiń basym bóliginde aýa raıy qubylmaly bolady. Keı jerlerde jańbyr jaýyp, naızaǵaı oınaıdy, jel kúsheıedi. Tek ońtústik óńirde ǵana ashyq aýa raıy saqtalady.
Bul týraly Qazgıdrometke silteme jasap, QR TJM baspasóz qyzmetinen habarlady. Aqmola, Shyǵys Qazaqstan, Mańǵystaý, Qostanaı, Pavlodar, Qaraǵandy oblystarynda, kúndiz Aqtóbe oblysynda jeldiń ekpini 15-20 m/s deıin jetedi. Atyraý oblysynda 15-20 m/s-qa deıin soqqan jelden shańdy burqasyn bolady. Soltústik Qazaqstan oblysynyń birqatar jerlerinde jel 15-20 m/s-qa deıin kúsheıip, tuman túsedi. Al kúndiz Almaty, Atyraý, Batys Qazaqstan, Aqtóbe, Qaraǵandy oblystarynyń keı jerlerinde qatty ystyq bolady. Eldiń ońtústiginde, batys, ońtústik-shyǵys, shyǵys jáne ortalyq óńiriniń keı jerlerinde órt qaýpi saqtalady.
