Ońtústik ónerpazdary QHR gastroldik saparmen boldy
ASTANA. QazAqparat - Ońtústik Qazaqstan oblysynyń óner sheberleri jeltoqsan aıynyń sońynda Qazaqstan Respýblıkasy Táýelsizdiginiń 25 jyldyǵy aıasynda Qytaı Halyq Respýblıkasyna gastroldik saparmen baryp qaıtty.
Bul týraly búgin OQO Aımaqtyq kommýnıkatsııalar qyzmetinde ótken brıfıngte oblystyq mádenıet jáne halyq shyǵarmashylyǵy ortalyǵy dırektorynyń orynbasary B.Jorabekov aıtty, dep habarlaıdy OQO ákiminiń baspasóz qyzmeti.
Sonymen qatar, búgingi baspasóz máslıhatyna QR Mádenıet qaıratkeri, «Qazyna» bı ansambliniń jetekshisi Z.Ájibekova men QR Mádenıet qaıratkeri, «Túrkistan» saraıynyń kórkemdik jetekshisi A.Isaeva qatysyp, Qytaı elindegi qandastarymyzdyń qazaq mádenıetine degen saǵynyshy týraly aıtyp berdi.
El Táýelsizdiginiń 25 jyldyǵyn merekeleý aıasynda Qytaı memleketinde ótken kontserttik baǵdarlama QR Mádenıet jáne sport mınıstrliginiń qoldaýymen ótti.
Qos el arasyndaǵy dostyq qarym-qatynasty nyǵaıtý, mádenı is-sharalar arqyly qandastar rýhyn asqaqtatyp, merekelik kóńil-kúı syılaý maqsatynda ótken kontserttik shara úsh kúnge jalǵasty.
Berik Jorabekovtyń aıtýynsha, atalǵan merekelik shara Sanjy qalasynyń «Aşyly», «Morgý» mádenıet ortalyqtarynda kúnine 2 ret uıymdastyryldy. Ónerpaz top ishinde QR Mádenıet qaıratkeri Ablaıhan Ospanov, Halyqaralyq bı baıqaýlarynyń birneshe dúrkin laýreaty «Qazyna» bı ansambliniń jetekshisi, QR Mádenıet qaıratkeri Z.Ájibekova, kontserttik baǵdarlamanyń rejısseri, QR Mádenıet qaıratkeri A.Isaeva, Halyqaralyq án baıqaýlarynyń laýreattary, dástúrli ánshi R.Ahynbekov, estrada ánshisi G.Nurjanova, vokal Q.Abdýsharıpovalar bar.
Kontserttik baǵdarlama barysynda ónerpazdar folklorlyq-etnografııalyq janrlarmen qosa qazaqtyń halyq ánderin, qazaq kompozıtorlarynyń ánderi men klassıkalyq áýenderin, estradalyq án tartýlaryn arnap, qandastarǵa merekelik lep syılap, rýhyn asqaqtatty.
Sharadan erekshe áser alǵan kórermender alǵystaryn bildirip, elden barǵan ónerpaz topqa qazaq kádesine saı syı-qurmet kórsetti.
