Ońtústik Koreıanyń Prezıdenti Pak Kyn He 7 mınıstrdi qyzmetinen bosatty
ASTANA. QazAqparat - Ońtústik Koreıanyń Prezıdenti Pak Kyn He 300-ge jýyq adamnyń ómirin jalmaǵan keme apatyna baılanysty úkimettegi 7 mınıstrdiń ornyn aýystyrdy, dep habarlady búgin Renhap agenttigi.
Atap aıtqanda, ekonomıkalyq máseleler vıtse-mınıstr, bilim, eńbek jáne jumyspen qamtý, mádenıet, ǵylym, sondaı-aq, genderlik teńdik pen otbasy máseleleri boıynsha mınıstrler, qaýipsizdik jáne qoǵamdyq ákimshilik mınıstri jańadan taǵaıyndaldy. Oǵan qosa, keshe saıası ister, áleýmettik máseleler, ekonomıka, bilim berý jáne mádenı salalar boıynsha kómekshilerin almastyrdy. Eske sala keteıik , bortynda 476 adam bolǵan «Sevol» jolaýshylar kemesi 16 sáýir kúni Ońtústik Koreıanyń ońtústik-batys jaǵalaýynda apatqa ushyrady. Qurban bolǵandardyń sany 300-ge jýyq. Kemeniń apatqa ushyraý isi boıynsha «Chonhechjın» kompanııasy qyzmetkerleriniń sanynan barlyǵy 20-ǵa jýyq adam ustaldy. Olardyń arasynda Koreıa keme júrgizý qaýymdastyǵynyń qyzmetkerleri men ekıpaj músheleri qaýipsizdik sharalaryn saqtamaǵan jáne syıbaılas jemqorlyqqa qatysty dep kúdiktelgender bar.
