Ońtústik Koreıanyń eks-prezıdentiniń qurbysy jıyrma jylǵa sottaldy
ASTANA. QazAqparat - Seýl soty seısenbi kúni Koreıa Respýblıkasynyń burynǵy prezıdenti Pak Kyn Heniń bala kúngi qurbysy Chhve Sýn Sıldi jıyrma jylǵa bas bostandyǵynan aıyrdy, dep habarlaıdy QazAqparat Renhap agenttigine silteme jasap.
Chhve Sýn Sıl sybaılas jemqorlyqqa qatysty aıyptalǵan soń, el tarıhyndaǵy tuńǵysh áıel prezıdent Pak otstavkaǵa ketken edi.
Sottyń sheshimimen Chhve Sýn Sıl 18 mlrd von (16.6 mln AQSh dollary) mólsherinde aıyppul da tóleıtin boldy.
62 jastaǵy áıel 2016 jyldyń qarashasynda sybaılas jemqorlyq jasady, burynǵy prezıdentpen baılanysyn asyra paıdalandy degen aıyppen ustaldy. Іs materıaldaryna qaraǵanda, Chhve Ońtústik Koreıanyń 50-ge jýyq konglomerattaryn jalpy 77,4 mlrd von mólsherindegi qarjyny ózi baqylaıtyn qorlarǵa aýdarýǵa májbúrlegen.
Prokýrorlar oǵan 25 jylǵa jabý jáne 118 mlrd von mólsherinde aıyppul tóleý jazasyn berýdi suraǵan, al Chhve ózine qoıylǵan aıyptardyń eshqaısysyn moıyndamady.
Burynǵy prezıdent jáne Chhve aınalasyndaǵy janjal elde jappaı narazylyqtarǵa sebep bolyp, halyq prezıdenttiń otstavkaǵa ketýin talap etken bolatyn. Osy talapty 2017 jyldyń naýryzynda Konstıtýtsııalyq sot ta qoldaǵan.
