Ońtústik Koreıanyń burynǵy prezıdenti 30 jylǵa sottalýy múmkin
ASTANA. QazAqparat - Seısenbi kúni Koreıa Respýblıkasynyń prokýratýrasy atyshýly sybaılas jemqorlyq isine qatysy bar eldiń burynǵy prezıdenti Pak Kyn Heni 30 jylǵa túrmege qamaýdy talap etti, dep habarlaıdy Yonhap agenttigi.
2017 jyldyń sáýir aıynda Seýl soty para aldy, ókilettiligin asyra paıdalandy, zańsyz qysym jasady jáne memlekettik qupııany jarııa etti degen aıyppen burynǵy memleket basshysy, 66 jastaǵy Pak Kyn Heni tutqyndaý týraly sanktsııa bergen edi.
Ol óziniń qurbysy jáne jaqtasy Chhve Sýn Sılmen kelise otyryp, iri ońtústikkoreıalyq konglomerattardan, sonyń ishinde Samsung, Lotte jáne SK kompanııalarynan bolysýshylyq jasaý úshin 59.2 mıllıard von (55,2 mıllıon AQSh dollary) berýin talap etken.
Pak Kyn He óziniń qurbysyna memlekettik isterge aralasýǵa jol bergen dep te kúdik keltirýde. «Qýǵynǵa ushyraǵan prezıdent» óz kinásin moıyndaǵan joq.
Budan bólek, Koreıa Respýblıkasynyń burynǵy basshysy óz isi boıynsha júrgizilgen sot otyrysyna qatyspaǵan. Yonhap agenttiginiń habarlaýynsha, sot qazan aıynda ony qamaýda ustaý merzimin uzartqannan keıin, Pak Kyn He tyńdalymǵa qatysýdan bas tartqan.
2017 jyldyń naýryzynda Konstıtýtsııalyq sot ımpıchmentti qoldap, Pak Kyn Heni prezıdent laýazymynan túbegeıli bosatty. Ol osy ýaqyt ishinde ol qamaýda bolǵan edi.
Budan buryn habarlanǵandaı, Seýl soty Koreıa Respýblıkasynyń burynǵy prezıdenti Pak Kyn Heniń bala kúngi qurbysy Chhve Sýn Sıldi jıyrma jylǵa bas bostandyǵynan aıyrǵan edi.
