Ońtústik Koreıamen aldyńǵy qatarly tehnologııalar salasynda yntymaqtasý kerek - Toqaev

NUR-SULTAN. QazAqparat - Qazaqstan tarapy Ońtústik Koreıamen sońǵy býyndy tehnologııalar salasynda yntymaqtastyqty damytýǵa múddeli. Bul týraly Qazaqstan-Koreıa bıznes-forýmynda QR Prezıdenti Qasym-Jomart Toqaev málim etti, dep habarlaıdy QazAqparat tilshisi.

Bul shara elimizge Koreıa Respýblıkasynyń Prezıdenti Mýn Chje Inniń memlekettik saparmen kelýine oraı uıymdastyryldy.

«Búginde Qazaqstanda iskerlik bastamalar men ınvestıtsııalardy júzege asyrý úshin qolaıly jaǵdaılar jasalǵan. Prezıdent retindegi ózimniń mindetimde koreı bıznesine barynsha járdemdesýdi kórip otyrmyn. Buǵan kásipkerlikti damytýǵa baǵyttalǵan bizdiń saıasat ta yqpal etedi. Bıznesti júrgizýdegi jeńildik boıynsha Doing Business reıtınginde Qazaqstan 28 orynda. Sonymen qatar Shetel ınvestorlary keńesi men «Astana» halyqaralyq qarjy ortalyǵy tabysty jumys isteýde», - dedi Memleket basshysy.

Q. Toqaev jalpy Táýelsizdik jyldarynda Qazaqstan Respýblıkasy Tuńǵysh Prezıdenti saıasaty arqasynda elimiz ekonomıkasyna 300 mlrd AQSh dollarynan astam qarjy tartylǵanyn atap ótti. Osy kórsetkish boıynsha tartylǵan ınvestıtsııa turǵysynda Qazaqstan postkeńestik elder arasynda aldyńǵy orynǵa shyqty.

Sonymen qatar QR Prezıdenti elimiz Koreıa Respýblıkasymen aldyńǵy qatarly tehnologııalardy engizý jáne Eýrazııada birlesken jobalardy júzege asyrý turǵysynda yntymaqtastyqqa múddeli ekenin jetkizdi.