Ońtústik Koreıaǵa jumysqa attanǵan qazaqstandyqtar elge qaıtyp jatyr - QR SІM
ASTANA. QazAqparat - Ońtústik Koreıaǵa jumysqa attanǵan qazaqstandyqtar Otanyna qaıtyp jatyr. Bul týraly QR Syrtqy ister mınıstrliginde ótken baspasóz máslıhatynda vedomstonyń resmı ókili Aıbek Smadııarov málim etti, dep habarlaıdy QazAqparat tilshisi.
«BAQ-tyń kómegimen bizdiń azamattarǵa biraz aqparat jetkizildi. Qýanyshtysy, kóbi qaıtyp jatyr. Naýryz aıynyń sońyna deıin «Jasyl dáliz» sharasy jalǵasady. Sondyqtan kútýdemiz. Naqty qansha azamattyń elge oralǵany týraly aqparat áli kelip túsken joq. Jyldyń sońyna taman Koreıa Úkimetimen birge biz ony túgendeımiz. Sodan keıin BAQ-qa jarııa etemiz», - dedi QR SІM resmı ókili Aıbek Smadııarov.
Eske sala ketsek, Aıbek Smadııarov qazan aıynyń ortasynda Ońtústik Koreıada zańsyz júrgender Qazaqstanǵa esh kedergisiz orala alatynyn málim etken bolatyn.
Qazan aıynda QR SІM konsýldyǵynyń aqparatyna sáıkes, Ońtústik Koreıada qazirgi tańda 19 myń qazaqstandyq resmı túrde tirkelgen, shamamen 12 myńǵa jýyq qazaqstandyq zańsyz túrde júrgeni aıtylǵan.
Ońtústik Koreıa úkimeti «Jasyl dáliz» is-sharasyn bastaǵan. Sol aktsııaǵa sáıkes, osy jyldyń 1 qazanynan bastap kelesi jyldyń 31 naýryzyna deıin Koreıa aýmaǵynda jumys istep zańsyz júrgen azamattar óz erkimen elderine qaıtatyn bolsa, eshqandaı aıyppulǵa ilikpeıdi. Al eger ony qoldanbaı, kúsheıtilgen reıdterdiń qoldaryna tússe, onda 6,5 mln teńge aıyppul arqalap, ol azamatqa on jyl merzimge Koreıaǵa kirýge tyıym salynady.
