Ońtústik Koreıaǵa zańsyz kirgen qazaqstandyqtardyń soty mamyr aıynda bolady

ASTANA. QazAqparat – Ońtústik Koreıaǵa zańsyz kirdi dep kúdikke ilingen Qazaqstannyń eki azamatynyń isi sotqa joldandy. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Koreıadaǵy bizdiń azamattarmen elmizdiń konsýly kezdesti. Ýaqytsha tergeý ızolıatorynda ustaý boıynsha olardyń shaǵymdary joq. Ustalǵan adamdardyń týystarymen turaqty baılanystamyz. Prokýratýra isti sotqa joldady. Sottyń alǵashqy otyrysy mamyr aıynyń ortasynda ótýi múmkin», - dedi A. Smadııarov elordadaǵy baspasóz máslıhatynda tilshiler suraǵyna jaýap bere otyryp.

Onyń aıtýynsha, bul azamattardyń isi boıynsha memlekettik advokat jumys istep jatyr.

Eske salaıyq, naýryzdyń sońynda eki otandasymyz Ońtústik Koreıaǵa kirýge tyıym salynǵanyna qaramastan atalǵan elge zańsyz aıaq basqany týraly habarlaǵan edik.

10 sáýir kúni Ońtústik Koreıaǵa zańsyz kirgen jerlesterimiz tergeý ızolıatorynda qamaýda otyrǵany belgili boldy.