Ońtústik Koreıaǵa keıbir qazaqstandyqtardy kirgizbeýdiń sebebi nede
ASTANA. QazAqparat - Sońǵy birneshe kúnniń ishinde Inchhon áýejaıynyń ımmıgratsııalyq qyzmeti Qazaqstannyń 15 azamatyn keri qaıtardy. QR Syrtqy ister mınıstrliginiń baspasóz hatshysy Ánýar Jaınaqov osy máselege qatysty túsinik berdi, dep habarlaıdy QazAqparat tilshisi.
«Iá, Almaty men Tashkentten barǵan ondaǵan Qazaqstan azamatyn Ońtústik Koreıaǵa kirgizbeı qoıdy. Bir qyzyǵy, olardyń úsheýi ǵana Seýl qalasyndaǵy elshiliktiń kómegine júgindi. Qalǵan azamattar ózderin ne úshin kirgizbegenin bilgen bolýy kerek», - deıdi Jaınaqov.
Onyń aıtýynsha, qazaqstandyq dıplomattar shuǵyl túrde Inchhon áýejaıynyń ımmıgratsııalyq qyzmetine habarlasyp, máseleniń mán-jaıyn bilgen edi. Sol kezde elshiliktiń kómegine júgingen úsh adamnyń ekeýi Ońtústik Koreıada zańsyz júrgen bolyp shyqty. Úshinshi azamat týrıstik maqsatyn durys kórsetpegen. Sol ushaqpen kelgen Qazaqstannyń basqa azamattary esh kedergisiz tekserýden ótti.
«Qazaqstannyń syrtqy ister vedomstvosy osy másele boıynsha únemi konsýltatsııalar ótkizip turady. Ońtústik Koreıanyń dıplomattary da tıisti sharalardy qolǵa alamyz dep otyr. Degenmen, qazirgi kezde qazaqstandyqtardy keri qaıtarýdyń bir sebebi anyq, vızasyz rejim boıynsha keletin keıbir adamdar zańsyz jumys isteýdi kózdeıdi. Ókinishke qaraı, ondaılardyń kesirinen basqa azamattar qolaısyzdyqtarǵa tap bolyp jatady», - dep atap kórsetti Jaınaqov.
