Ońtústik Koreıadan jumys taýyp berýge ýáde bergen alaıaq ustaldy
ALMATY. QazAqparat - Almaty turǵyny Ońtústik Koreıadan jumys taýyp beretini týraly jalǵan ýáde berip, 85 qazaqstandyqty aldaǵan, dep habarlaıdy «QazAqparat» tilshisi ІІD baspasóz qyzmetine silteme jasaı otyryp.
Almaty qalasy Bostandyq aýdany ІІB qyzmetkerleri 1983 jyly týǵan A.Sýjenkoǵa qatysty alaıaqtyq jasady degen kúdikpen qylmystyq is qozǵady.
«Tergeý barysynda belgili bolǵandaı, Sýjenko Ońtústik Koreıadan «jumys taýyp» berýmen aınalysqan. Bul qyzmeti úshin ol azamattardan 500 myń teńge alǵan. Klıentterine Koreıada aıyna 2500 AQSh dollar jalaqy tóleıtin zaýyttan jumys taýyp beretinin aıtyp, aqsha alyp kelgen. Oǵan qosa, Sýjenko til, kásibı biliktilik talap etilmeıtinin aıtyp, sendirgen. Onyń bul usynysyna Qazaqstannyń birneshe qalasynan adamdar habarlasyp, «qarmaǵyna» ilingen. Alaıda, ol aqsha alǵan adamdarynyń eshbirin de jumysqa ornalastyrmaǵan», - deıdi Bostandyq aýdandyq ІІB-niń basshysy podpolkovnık Dinmýhamed Áýelhan.
«Qazirgi ýaqytta bizdiń bólimge 85 adam aryzdandy. Tergeý barysynda bul is boıynsha zardap shegýshilerdiń sany artýy múmkin. Qazirgi ýaqytta QR QK 190 babynyń 4-bóligi boıynsha qylmystyq is qozǵaldy. Sýjenkonyń áreketinen japa shekkender bolsa, 298-52-80; 298-52-81 jáne 298-52-82 telefondaryna habarlasýdy suraımyz. Kúdikti Almaty qalasy ІІD ýaqytsha tergeý oqshaýlaǵyshyna qamaldy», - dedi ol.
