Ońtústik Koreıadan azamattardy evakýatsııalaıtyndaı másele ýshyqqan joq - Berik Qamalıev

NUR-SULTAN. QazAqparat – Indýstrııa jáne ınfraqurylymdyq damý vıtse-mınıstri Berik Qamalıevtyń aıtýynsha, Ońtústik Koreıada júrgen otandastarymyzdyń keıbiri elge evakýatsııalaý jolymen qaıtýǵa nıet bildirgen, dep habarlaıdy QazAqparat tilshisi.

«Búgin buqaralyq aqparat quraldarynyń birinde qymbat bıletter týraly (birinshi sanattaǵy elderden keletin Qazaqstan azamattarynyń elge qaıtýy úshin) jazylǵanyn baıqap qaldym. Ońtústik Koreıada Qazaqstan elshiligine júginip, elge evakýatsııa jolymen oralýǵa nıet bildirgen otandastarymyz bar. Alaıda qazir evakýatsııa jasaıtyndaı másele sonshalyqty ótkir emes. Buǵan deıin aıtqanymdaı Qazaqstan men Ońtústik Koreıa arasynda apta saıyn reıster oryndalýda. Apta saıyn 700 jolaýshyny jetkizýge bolarlyqtaı reıster oryndalyp jatyr», - dedi Berik Qamalıev OKQ-da ótken baspasóz máslıhatynda.

Eske sala ketsek, Berik Qamalıev Qazaqstanǵa keletin jolaýshylardyń tasymalyn shekteý boıynsha jańa sharalardyń engiziletinin málim etken edi.

Onyń aıtýynsha, 8 naýryzdan bastap 1-shi sanattaǵy elderdiń azamattary Qazaqstanǵa kire almaıdy.

Qazaqstan birinshi sanatqa kirgizgen elderdiń ishinde – Ońtústik Koreıa da bar. Alaıda bul shekteýdiń sol eldegi Qazaqstan azamattaryna qatysy joq.