Ońtústik Koreıadaǵy sý tasqynynan 3 adam qaza tapty
SEÝL. QazAqparat – Ońtústik Koreıada tolassyz jaýǵan jańbyr men kúshti jeldiń saldarynan sý tasqyny bolyp, úsh adam qaza tapty jáne ondaǵan adam zardap shekti. Bul týraly QazAqparat Yonhap-qa silteme jasap habarlady.
Tabıǵı apattarǵa qarsy kúres basqarmasynyń ortalyq shtab-páteri beısenbi keshke úsh adamnyń óz avtokólikterinde óli kúıde tabylǵanyn habarlady. Olardyń kólikteri Pýsan qalasyndaǵy jerasty ótkelinde sý astynda qaldy. Sondaı-aq, bir adamnyń iz-túzsiz joǵalǵany habarlady.
Hyundai Motor negizgi zaýyttary ornalasqan Ýlsan ónerkásiptik qalasynda da nóser jańbyr jaýǵan. Onyń mólsheri 215,5 mıllımetrdi quraǵan. Sonyń saldarynan qalada kóshkin men sý tasqyny bolǵan.
Tabıǵı apatqa qarsy kúres ulttyq ortalyǵynyń málimetinshe, jalpy elde 195 adam evakýatsııalanǵan.
Eldegi kólemi boıynsha ekinshi qala sanalatyn Pýsanda saǵatyna 80 mm jaýǵan nóser kóptegen kóshkinniń júrýine sebep bolǵan.
Turǵyndar áleýmettik jelilerde belsendi bólisip jatqan sýretterden jańbyr sýynyń aǵyny jerasty metrosyna aǵyp jatqanyn kórýge bolady. Kóptegen avtobýstar jartylaı sýǵa batyp qalǵan. Qala kósheleri alyp kólge aınalǵan. Pýsanda 162 úıdiń sý astynda qalǵany tirkelgen.
El astanasy Seýlde qala magıstraldarynyń keıbir bóligi sý deńgeıiniń kóterilýine baılanysty jabyldy. Kengıdo provıntsııasynda 1100 abonenttiń jaryǵy ýaqytsha sónip qalǵan.
Meteorologtardyń málimetinshe, Seýlde, Inchhonda jáne Kengıdo provıntsııasynda nóser juma kúni toqtaıdy.
