Ońtústik Koreıada júrdek poıyz relsten shyǵyp ketti
ASTANA. QazAqparat - Senbi kúni Koreıa Respýblıkasynda júrdek poıyzdyń relsten shyǵyp ketýiniń saldarynan kem degende 14 adam zardap shekti, dep habarlaıdy QazAqparat Yonhap News agenttigine silteme jasap.
Jolaýshysy bar poıyz Kannynnan Seýlge 103 km/saǵ jyldamdyqpen bara jatqanda, jergilikti ýaqytpen 07:35-te 10 vagonynyń barlyǵy relsten shyǵyp ketken. Zardap shekkender aýrýhanaǵa jetkizildi.Koreıa Respýblıkasynyń Memlekettik aýmaqtar, ınfraqurylym jáne kólik mınıstrligi oqys oqıǵanyń sebepterin anyqtaý úshin arnaýly topty jiberdi.
Yonhap News-tiń habarlaýynsha, bul Kannyn men Seýl arasyndaǵy alǵashqy iri temirjol apaty. Temirjol Phenchhandaǵy qysqy Olımpıada oıyndarynyń qarsańynda, 2017 jyldyń jeltoqsanynda ashylǵan bolatyn. 
