Ońtústik Koreıada jarylystan japa shekken Qazaqstan azamatyna shuǵyl ota jasaldy - QR SІM
ASTANA. QazAqparat - Ońtústik Koreıada jarylystan japa shekken Qazaqstan azamatyna shuǵyl túrde ota jasaldy. Bul týraly «QazAqparat» tilshisine QR Syrtqy ister mınıstrliginiń baspasóz qyzmeti habarlady.
«Qolda bar aqparat boıynsha, 2016 jyldyń 4 sáýirinde Ońtústik Koreıanyń KHDR-men shekaralas jatqan Kanvon provıntsııasynda jarylys oryn aldy, saldarynan 1962 jyly týǵan Qazaqstan azamaty zardap shekti. Arnaıy sanıtarlyq ushaq bortymen QR azamaty Seýl qalasynyń «SeoulYonsei» aýrýhanasyna jetkizilip, onda oǵan jedel túrde ota jasaldy. Oqıǵa saldarynan ol oń aıaǵyndaǵy tórt baqaıynan aıyrylyp otyr. Qazirgi ýaqytta zardap shekken azamattyń hal-jaǵdaıy turaqty», - delingen habarlamada.
Seýldaǵy QR Elshiliginiń habarlaýynsha, ol Ońtústik Koreıaǵa medıtsınalyq tekserýden ótýge kelgen. 2016 jyly 31 naýryzda ol azamat atalǵan provıntsııaǵa jenshen ósiretin fermaǵa jumysqa ornalasqan.
Tergeýdiń aldyn ala málimetterine qaraǵanda, jarylysqa 1951-53 jyldaryndaǵy koreıalyq soǵystan jarylmaı qalǵan mınadan bolýy yqtımal. Qazirgi ýaqytta Koreıanyń Ulttyq polıtsııasy jáne Qorǵanys mınıstrliginen qurylǵan tergeý toby jumys jasap jatyr jáne zertteý nátıjelerin qosymsha habarlaıtyn bolady.
