Ońtústik Koreıada jan túrshigerlik jol apatynan 4 adam qaza taýyp, 9-y jaraqat aldy
NUR-SULTAN. QazAqparat – Dúısenbi kúni tańerteń Koreıa Respýblıkasynyń soltústik-shyǵysyndaǵy Kanvondo provıntsııasynda 16 jolaýshysy bar fýrgon aýdaryldy, dep habarlaıdy QazAqparat Yonhap agenttigine silteme jasap.
Apat saldarynan tórt adam oqıǵa ornynda kóz jumdy. Taǵy toǵyz jolaýshy jaraqat alyp aýrýhanaǵa jetkizilgen, onyń úsheýi hal ústinde jatyr. Jol apaty 7:33-te Samchhok qalasynda bolǵan.
Polıtsııanyń málimdeýinshe, 16 jolaýshynyń ishindegi jeteýi sheteldikter bolǵan, qazir sonyń úsheýiniń qaıda ekeni belgisiz.
Polıtseılerdiń sózine qaraǵanda, jolaýshylar egis tanaptarynda jumys isteýge bara jatqan.
Qazir apat saldary tekserilip, jol erejesi buzylǵan-buzylmaǵany anyqtalyp jatyr.
