Ońtústik Koreıada zańsyz jumys isteıtin qazaqstandyqtardyń máselesi sheshilýi múmkin

ASTANA. QazAqparat – Qazaqstandyqtardyń Ońtústik Koreıada eńbek etip, qyzmet atqarýy máselesi ekijaqty kelisim arqyly zańdastyrylmaq. Bul týraly ortalyq kommýnkatsııalar qyzmetinde ótken brıfıng barysynda belgili boldy, dep habarlaıdy QazAqparat tilshisi.

«Qazaqstan azamattarynyń shetelde eńbek etip, qyzmet etip, biliktiligin kóterýin retteý - mańyzdy baǵyttardyń biri. Atalǵan másele Prezıdenttiń 2021 jylǵy halyqqa joldaýynda aıqyndalǵan. Bul - jahandyq trend. Qazaqstandyqtardyń shetelde eńbek etýine shekteý qoıa almaımyz, onyń qajeti de joq. Kerisinshe, otandastarymyzdyń shetel asyp eńbek etýine, óz salasy boıynsha biliktiligin arttyryp, jetistikterge jetýine qoldaý kórsetemiz. ıAǵnı azamattardyń sheteldegi eńbek quqyqtaryn qorǵaıtyn bolamyz. Osy oraıda búginde Túrkııa, BAÁ, AQSh, Ulybrıtanııa, Soltústik Irlandııa, Ońtústik Koreıa, Izraıl, Qatar, Germanııaǵa Syrtqy ister mınıstrligi arqyly kelisimshart jobasy joldandy. Oǵan qol qoıylǵannan keıin atalǵan elderde eńbek etip jatqan qazaqstandyqtardyń quqyǵyn qorǵaıtyn zańdy qujat bolady», - dedi Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov.

Sondaı-aq, kóshi-qon komıtetiniń basshysy Ońtústik Koreıa elindegi qazaqstandyq jumys kúshine qatysty málimdeme jasady.

«Koreıa elinen jyl saıyn qazaqstandyqtarǵa qatysty ártúrli jaǵymsyz málimetter kelip jatady. Ol el eńbek mıgratsııasy máselesin shet memlekettermen ekijaqty kelisim arqyly ǵana júzege asyrady. Osy máseleni retteýdi qolǵa alyp jatyrmyz. Sáýirdiń 25-26-de jumys toby Seýlge baryp eńbek mıgratsııasy máselesin talqylaıdy. Qazir Ońtústik Koreıada 16 elge eńbek kvotasy beriledi, kelesi bop bizdiń el qarastyrylyp jatyr», - deıdi ol.