Ońtústik Koreıada vırýs juqtyrǵandar sany 1 myńnan asty
SEÝL. QazAqparat – Sársenbi kúni Ońtústik Koreıada taǵy 169 adamnyń koronavırýs juqtyrǵany belgili boldy, dep habarlaıdy QazAqparat Renhap agenttigine silteme jasap.
Osylaısha, elde jalpy koronavırýs juqtyrǵandar sany 1 146-ǵa jetti. Eske sala ketsek, Ońtústik Koreıada vırýs juqtyrǵan alǵashqy adam qańtardyń sońynda tirkelgen bolatyn.
Qazirgi ýaqytta Ońtústik Koreıada koronavırýstan 11 adam qaıtys boldy, onyń ishinde baýyrdy aýystyrý úshin aýrýhanaǵa jatqyzylǵan 36 jastaǵy Mońǵolııa azamaty bar.
Іndettiń 80 paıyzǵa jýyǵy koronavırýstyń negizgi taralý oshaǵy – ońtústik-shyǵysta ornalasqan Tegý qalasyndaǵy dinı sekta men kórshiles Chhonda ýezindegi emhanada tirkeldi.
169 jańa oqıǵanyń 153-i Seýlden ońtústik-shyǵysqa qaraı 300 shaqyrym jerde ornalasqan Tegý qalasy men kórshiles Soltústik Kensanda tirkeldi.
Barlyq iri provıntsııalar men qalalar ınfektsııa juqtyrǵan adamdardyń bar ekeni týraly habar berdi. Ońtústik Koreıa astanasy Seýlde taǵy tórt adam vırýs juqtyrdy. Mundaı málimetti Koreıanyń aýrýlardy baqylaý jáne aldyn alý ortalyǵy (KCDC) usyndy.
KCDC deregi boıynsha, Ońtústik Koreıada aýqymy jaǵynan ekinshi oryn alatyn Pýsanda taǵy 8 adam vırýs juqtyrǵany anyqtaldy. Eldegi halyq eń tyǵyz ornalasqan Kengıdo provıntsııasynda bir adam indet juqtyrǵan.
Jeksenbi kúni vırýsty eskertý dárejesi eń joǵarǵy – «qyzylǵa» jetkennen keıin, densaýlyq saqtaý organdary vırýs oshaǵy - Tegý qalasy men Soltústik Kensan provıntsııasynda indettiń taralýyn toqtatýǵa basa nazar aýdara bastady.
Sarapshylardyń aıtýynsha, jaqyn kúnderi koronavırýs juqtyrǵandardyń sany artady. Óıtkeni densaýlyq saqtaý organdary Sınchhondjı men basqa provıntsııalardaǵy Iısýs shirkeýi dinı sektasynyń 210 myńnan astam múshesin tekseristen ótkizýdi josparlap otyr.
