Ońtústik Koreıada ulttyq óner túrlerine arnalǵan derekti fılmder festıvali ótedi
ALMATY. 29 maýsym. QazAqparat /Erlik Erjanuly/ - Ońtústik Koreıada 2012 jyldyń mamyr aıynda ulttyq óner túrlerine arnalǵan derekti fılmder festıvali ótedi. Uıymdastyrýshylar úmitkerlerdiń stsenarııin iriktep, oǵan qatysatyn derekti fılmderdiń túsirý jumysyn ózderi qarjylandyrmaq.
"Bul jaqynda Ońtústik Koreıada ótken rejısserlar men stsenarısterdiń 10 kúndik halyqaralyq semınarynda málim boldy. Onda kárister Azııadaǵy ózine tamyrlas, ekonomıkalyq-mádenı jaǵynan jaqyn elderdiń ókilderin shaqyrǵan bolatyn. Semınar kezinde olar ózderiniń ulttyq dástúrimen tanystyryp, sol boıynsha ózge elderden kelgen rejısserlar túrli fılmder jasady. Ony bárimiz ózara talqylap, pikir almastyq. Bul bir jaǵynan bizdiń qabiletimizdi, dúnıetanymyzdy baıqaý boldy", - deıdi "Dúnıejaryq" fılmniń rejısseri Jánibek Jetirý. Onyń aıtýynsha, bul sharanyń basty maqsaty ár elde halyqtyq deńgeıde kórsetiletin óner túrlerine baılanysty fılmder jasap, kelesi jyly arnaıy festıval uıymdastyrýǵa ázirlik boldy.
"Semınardyń qorytyndysy boıynsha olar aldaǵy jyly ótkizilgeli otyrǵan festıvalge usynatyn derekti fılmderdiń stsenarıılerine baıqaý jarııalady. Oǵan men Qazaqstandaǵy jyraýlyq óner týraly stsenarııimdi usynyp otyrmyn. Qazir olar úmitkerlerdiń shyǵarmalaryn saraptamadan ótkizip jatyr. Aldaǵy ýaqytta ózderi iriktep alǵan stsenarııler boıynsha fılmder túsirý úshin qarjy bólý týraly sheshim shyǵarady", - deıdi J.Jetirý.
