Ońtústik Koreıada turǵyndar erlik jasaǵan qazaq jigitin marapattaýdy usynyp, prezıdentke hat jazdy
NUR-SULTAN. QazAqparat - Ońtústik Koreıada Qazaqstan azamaty órt kezinde 10 adamdy qutqaryp, memlekettik marapatqa usynyldy, dep habarlaıdy QazAqparat «Habar24» telearnasyna silteme jasap.
Telearnanyń habarlaýynsha, túrkistandyq Álı otbasymen birge 2017 jyly ıAn ıAn shıpajaıly qalashyǵyna jumys izdep kelgen. Oqıǵa ótken aıda bolǵan. 23 naýryz kúni túngi saǵat 11-de tútin ıisin sezgen. Sóıtse, kórshi páterlerdiń birinde órt shyqqan.
Órt bolǵan bólme ishinde áıel qalyp qalǵan. Álı ol bólmeniń esigin asha almaı, páterge gaz qubyrymen jáne telekabelmen órmelep shyǵyp, ishine kirgen. Ókinishke qaraı, órt shyqqan páterde bolǵan áıel keıinnen aýrýhanada kóz jumǵan. Otandasymyz ózge kórshilerin oıatyp úlgergen. Sonyń arqasynda olar der kezinde syrtqa shyǵyp, aman qalǵan.
«Іshke kirip, esikti ashyp shyqqan soń órt sóndirýshiler keldi. Jedel járdem, bári keldi. Káris áıeldi aýrýhanaǵa deıin apardy, kómektesti», - dedi Álı.
Jerlesimiz erligi jaıly da, órt kezinde denesin kúıik shalǵany týraly da týystaryna tis jarmapty. Medıtsınalyq kómekten de bas tartqan. Alaıda kórshileri boı bermeı, ony aýrýhanaǵa jetkizip, emge ketetin shyǵyndy ózderi tólegen.
«Keshe gazette, ınternette sosyn feısbýkte shyqqannan keıin úıdegiler kórip, anam jylap jiberdi. Ol bilmeıtin edi. Kórdi. Qolym, qulaǵym, moınym dákemen oralǵan. Jumysta ondaı-ondaı boldy, qulap tústim dedim», - dedi Álı.
Telearna málimdegendeı, Álı jaqynda úıine qaıtady. Reısi 1 mamyrǵa josparlanǵan. Alaıda kórshileri onyń ketkenin qalamaıdy. Sondyqtan Ońtústik Koreıa Prezıdentiniń atyna hat jazyp, jerlesimizdi marapatqa usyný týraly ótinish bildiripti.
Kórshileri eldiń Ádilet mınıstrligine de onyń erligi jaıly jazylǵan maqalalar usynǵan. Sonyń arqasynda onyń Koreıada júrip-turý ýaqyty uzartyldy.
