Ońtústik Koreıada taıfýn saldarynan 6,5 myń úı jaryqsyz qaldy
ASTANA. QazAqparat - Búgin tańerteń Ońtústik Koreıanyń ońtústiginde ornalasqan Chedjý aralyn Soýlık taıfýny soqty. Daýyl juma kúni Seýlge jetedi dep kútilýde, dep habarlaıdy QazAqparat tilshisi Yonhap agenttigine silteme jasap.
Koreı meteorologııalyq basqarmasynyń málimetinshe, taıfýn aralǵa saǵatyna 16 shaqyrym jyldamdyqpen jetken. Óńirde túnimen jańbyr jaýǵan.
Daýyl men nóser jańbyrdyń saldarynan 20 jastaǵy boıjetken iz-tússiz joǵalyp, bir er adam jaraqat aldy. Aralda elektr qýaty óship, shamamen 6 500 úı jaryqsyz qalǵan.
Taıfýn juma kúni túnniń ortasynda Ońtústik Koreıanyń ońtústik bóligine, Seýlge juma kúni shamamen tańǵy 7-lerde jetedi dep kútilýde.
Eldegi teńiz porttary qaýipsizdikti qamtamasyz etý maqsatynda ýaqytsha jumysyn toqtatty. Sondaı-aq, negizgi 9 áýejaıdan ushatyn 216 reıs toqtatyldy. Budan bólek, Ońtústik Koreıanyń 1 490 mektebinde sabaqtar keıinge qaldyryldy.
Koreı meteorologııalyq basqarmanyń málimetinshe,daýyl búgin-erteń Shyǵys teńizge jetip, Reseıdiń Prımorskıı kentine qaýip tóndirýi múmkin.
Foto: www.meteonova.ru
