Ońtústik Koreıada taǵy 52 adam koronavırýs juqtyrdy
SEÝL. QazAqparat – Ońtústik Koreıada koronavırýs juqtyrýdyń taǵy 52 jaǵdaıy tirkeldi. Osylaısha, atalǵan eldegi ınfektsııa juqtyrǵandar sany 156 adamǵa jetti, dep habarlaıdy QazAqparat YONHAP NEWS AGENCY agenttigine silteme jasap.
Aýrýdy jańadan juqtyrǵandardyń kóbi Tegý qalasynyń ońtústik-shyǵysynda shirkeý qyzmetine kelgen adamdar. Jańadan aýrý juqtyrǵan 52 adamnyń 41-i – Seýlden ońtústik-shyǵysqa qaraı 300 shaqyrym jerde jáne kórshiles Soltústik Kensan provıntsııasynan. Seýlde taǵy úsh jaǵdaı tirkeldi, dep habarlaıdy Koreıanyń aýrýlardy baqylaý jáne aldyn alý ortalyǵynyń (KCDC) málimdemesinde.
Infektsııa birden baıqala qoımaǵan osy eki qalada aýrýdyń órshýi Densaýlyq saqtaý sheneýnikterin COVID-19 jergilikti jerde tarala bastaǵanyn habarlaýǵa májbúr etti.
Juqtyrǵandar sany artqannan keıin jáne koronavırýstan qaza tabý jaǵdaılarynan keıin úkimet Tegý men Chhondo qalalaryn «erekshe basqarý aımaqtary» retinde jarııalaý jóninde sheshim qabyldady.
Tegýde jáne kórshiles provıntsııa Soltústik Kensanda rastalǵan jaǵdaılardyń jalpy sany - 111, al Tegýde shirkeý qyzmetine baılanysty vırýsty juqtyrý jaǵdaılarynyń sany 82-ge jetti.
Juma kúni vırýstyń bolýyna test jasalǵan jáne karantındegi adamdar sany 2707 adamdy qurady, beısenbide bul kórsetkish 1860 bolǵan.
3 qańtardan bastap Ońtústik Koreıa COVID-19 vırýsyna qatysty 14 816 adamǵa tekserý júrgizdi, 11 953 adamda vırýs joq, al 16 patsıent tolyq saýyqqannan keıin karantınnen shyǵaryldy.
