Ońtústik Koreıada sottalǵan qazaqstandyqtar aıyppuldy 7 kúnde tóleýi kerek

ASTANA. QazAqparat – QR Syrtqy ister mınıstrligi Ońtústik Koreıaǵa zańsyz kirgeni úshin sot úkimi shyqqan qazaqstandyqtardyń jazasy qalaı óteletinin túsindirdi, dep habarlaıdy QazAqparat.

«Inchhon qalasynyń aımaqtyq soty QR azamattarynyń árqaısysyna 3 mln koreı von kóleminde (1 mln teńgeden astam) aıyppul salý, odan keıin elden deportatsııalaý týraly sheshim shyǵardy. Aıyppuldy sot belgilegen merzimde – 7 kúnde tóleı almaǵan jaǵdaıda, olarǵa aıyppuldy óteý úshin 30 kún jumys isteý múmkindigi beriledi», - dep jazylǵan Syrtqy ister mınıstrliginiń habarlamasynda.

Qazaqstandyq dıplomattar QR azamattaryna barlyq qajetti konsýldyq-quqyqtyq kómek kórsetken. Olardyń týystarymen jáne jergilikti quqyq qorǵaý organdarymen turaqty baılanysta bolǵan jáne sot protsesine de qatysqan.

Sonymen birge, olardyń advokaty Meıirjan Shekeev áleýmettik jelide aıyppul tóleýge halyqtan aqsha jınaı bastady.

Eske salaıyq, naýryzdyń sońynda eki otandasymyz Ońtústik Koreıaǵa kirýge tyıym salynǵanyna qaramastan atalǵan elge zańsyz aıaq basqany týraly habarlaǵan edik.

10 sáýir kúni Ońtústik Koreıaǵa zańsyz kirgen jerlesterimiz tergeý ızolıatorynda qamaýda otyrǵany belgili boldy.

Sottyń alǵashqy otyrysy mamyr aıynyń ortasyna josparlandy.