Ońtústik Koreıada sottalǵan qazaqstandyq apellıatsııaǵa berdi
NUR-SULTAN. QazAqparat - Ońtústik Koreıada sottalǵan qazaqstandyq sotqa apellıatsııa berdi. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«Kishkentaı balany qaǵyp ketý aıyby taǵylǵan azamatymyzdy 2,5 jylǵa abaqtyǵa qamaý týraly úkim shyqqan. Qazirgi ýaqytta ol óz quqyǵyn paıdalanyp, apellıatsııaǵa berdi. ıAǵnı, onyń qorǵaýshysy barlyq qujattardy daıyndap, 7 kúnniń ishinde berýi tıis bolatyn. Búginde olar bul sheshimdi qaıta qaraý týraly apellıatsııa berdi», - dedi Aıbek Smadııarov BAQ ókilderiniń saýalyna oraı.
Onyń aıtýynsha, keıbir BAQ-ta jarııalanǵan «qazaqstandyq azamat shamamen 50 myń dollar kóleminde aıyppul tóleýi tıis» delingen aqparat shyndyqqa janaspaıdy. Bul soma sot barysynda qalany emdeýge ketken shyǵyn retinde aıtylǵan.
«Ózge qarjylaı aıyppul jaıynda sóz bolǵan emes»,- dedi resmı ókil.
Eske salsaq, jol apaty byltyr 16 qyrkúıekte boldy.
Keıin QR Syrtqy ister mınıstrligiń resmı ókili Aıbek Smadııarov balany qaqqan 20 jastaǵy qazaqstandyq Pavlodarda júrgenin málim etti. Ońtústik Koreıada balany qaǵyp ketken qazaqstandyq Syrym Sháribek eki jyl alty aı merzimge bas bostandyǵynan aıyryldy.
