Ońtústik Koreıada sońǵy 80 jylda bolmaǵan nóser jaýynnan 7 adam qaza boldy
SEÝL. QazAqparat - Seýl men onyń mańyndaǵy aımaqtarda sońǵy 80 jylda bolmaǵan nóser jaýyn jaýyp, saldarynan jeti adam qaza tapty, taǵy altaýy iz-túzsiz joǵalyp ketken. Úılerdi, kólikterdi, ǵımarattar men metro stantsııalaryn sý basyp qaldy, dep habarlaıdy QazAqparat Yonhap agenttigine silteme jasap.
Seýldiń keıbir bólikteri, batystaǵy Inchhon port qalasy jáne Kengı provıntsııasyna dúısenbi kúni keshke saǵatyna 100 mm-den astam jaýyn jaýdy, Dondjak aımaǵynda saǵatyna 141,5 mm-den asyp ketti, bul 1942 jyldan bergi eń mol jaýyn-shashyn.
Seýldegi tolassyz jaýǵan jańbyr bes adamnyń ómirin qıdy, tórteýi iz-túzsiz joǵaldy. 163 adam baspanasyz qalyp, mektepter men basqa memlekettik mekemelerdi panalady. Kengıdo provıntsııasynda eki adam qaza taýyp, taǵy ekeýi iz-túzsiz joǵalǵan, toǵyz adam jaralandy.
Úkimettiń habarlaýynsha, órt sóndirý qyzmeti 88 adamdy qutqarǵan.
Jaýǵan nóser kóptegen qoǵamdyq nysandardyń jumysyn toqtatty. Seýl, Inchhon jáne basqa jerlerde segiz temir joldy sý basyp, keıbir temirjoldar men metro jelilerinde qyzmet kórsetý ýaqytsha toqtatyldy dep habarlandy. Qaýipsizdik maqsatynda eldegi joldardyń 80-ge jýyq ýchaskesi, úsh jerasty bóligi jáne ózen jaǵasyndaǵy 26 avtoturaq jabyldy. On toǵyz jolaýshy paromynyń baǵyty toqtatyldy.
Koreıanyń meteorologııalyq basqarmasynyń málimeti boıynsha, eldiń ortalyq jáne basqa aımaqtarynda saǵatyna 50 mm-ge deıin jańbyr jaýdy, Seýlde dúısenbiden seısenbige deıin jınalǵan jaýyn-shashyn mólsheri 422 mm-ge jetti. Sársenbige deıin el astanasy men Gangvon provıntsııasynda jaýyn-shashyn mólsheri 300 mm-ge deıin artýy múmkin dep boljanyp otyr.
Koreıanyń Orman qyzmeti seısenbi kúni tańerteń búkil el boıynsha 47 qala men okrýgke kóshkin qaýpi týraly eskertý jasady, onyń ishinde Seýldegi toǵyz aýdan, Inchhon, Kengıdo, Kanvondo, Soltústik jáne Ońtústik Chhýnchhon provıntsııalary bar.
Foto: en.yna.co.kr
