Ońtústik Koreıada ótetin Azıadada Qazaqstan 26 altyn medal enshileýdi josparlaýda
ASTANA. QazAqparat - Ońtústik Koreıanyń Inchhon qalasynda ótetin 17-shi jazǵy Azıada oıyndarynda Qazaqstan quramasy 26 altyn medal enshileýdi josparlaýda. Bul týraly búgin QR Sport isteri jáne dene shynyqtyrý agenttigi tóraǵasynyń orynbasary Elsııar Qanaǵatov málim etti.
«Bizdiń mindetimiz sporttyń 15 túrinen 26 altyn medal jeńip alý. Bul Qazaqstan quramasynyń jalpykomandalyq esepte 4-orynǵa turaqtaýyna múmkindik beredi», - dedi ol.
Onyń sózine qaraǵanda, agenttik jeńil atletıka, aýyr atletıka, baıdarka men kanoe esýden sportshylarymyzdyń joǵary nátıje kórsetindigine senim artyp otyr. Jalpy, sporttyń 30 túrinen sańlaqtarymyz júldeli oryndarǵa ıe bolatyndyǵyna senim bar.
«Tolyqtaı alǵanda, sporttyń 39 túrinen 400-410 sportshy qatysatyndyǵy josparlanýda. Bul ótken Azıada oıyndaryna qaraǵanda 40-50 adamǵa jáne sporttyń 3 túrine artyq», - dedi E.Qanaǵatov.
Aıta keteıik, 17-shi Azıada oıyndary qyrkúıektiń 19-y men qazannyń 4-i aralyǵynda ótedi. Osy jolǵy oıyndarǵa álemniń 45 elinen 13 myńnan astam sportshy men jattyqtyrýshy qatysady. Azıada oıyndarynan 7 myń BAQ ókili habar taratady.
