Ońtústik Koreıada muǵalim eń bedeldi 5 mamandyqtyq biri sanalady
BІShKEK. 26 sáýir. QazAqparat - Ońtústik Koreıada pedagogıkalyq joǵary oqý ornyn bitirgen mamandar muǵalim bolý úshin mindetti memlekettik synaqtan ótedi.
Bul týraly keshe Bishkekte ótken "Ortalyq Azııadaǵy pedagogıkalyq kadrlardy daıyndaýdyń teorııasy men praktıkasy" dep atalatyn ІІ halyqaralyq konferentsııa kezinde aıtyldy.
"Ońtústik Koreıada muǵalim eń bedeldi 5 mamandyqtyń biri sanalady. Onda muǵalimderdi daıyndaýda jáne olardy jumysqa qabyldaýdaǵy talap óte qatal. Sondyqtan joǵary oqý ornyn bitirip, ustaz bolýdy qalaıtyndardyń tek 30 paıyzy ǵana óz armanyn júzege asyra alady", - deıdi "Manas" qyrǵyz-túrik ýnıversıtetiniń Qoǵamdyq ǵylymdar ınstıtýtynyń pedagogıka magıstri Aıperi Narbaeva. Onyń aıtýynsha, muǵalim bolýdy qalaıtyn mektep bitirýshiler joǵary oqý ornyna túsý úshin mekteptegi sabaqtardan alǵan baly joǵary bolý kerek. Sondaı-aq SAT (Scholastic Assessment Test) testen jınaǵan baly ortadan joǵary bolýy shart jáne ózin joǵary oqý ornyna túsýge daıyndaǵan jaldamaly muǵalimderdiń usynymyn alýy qajet. Odan keıin aýyzsha synaqtan ótse ǵana stýdent atana alady.
A.Narbaevanyń sózine qaraǵanda, «Ońtústik Koreıada muǵalimderdi maqsatty daıyndaý júıesi úsh satydan turady. Onda 4 jyldyq bakalavrıatta bastapqy jáne orta mektep muǵalimderi daıyndalady. Oqý merzimi 2-3 jyldy quraıtyn magıstratýrada orta mektep jáne kásiptik kolledj muǵalimderi, al 3-4 jyldyq doktorantýrada joǵary oqý oryndarynyń oqytýshylary ázirlenedi.
