Ońtústik Koreıada MERS koronavırýsynan qaıtys bolǵandardyń sany 19 adamǵa jetti
ASTANA. QazAqparat - Ońtústik Koreıanyń Densaýlyq saqtaý jáne ál-aýqat mınıstrligi taıaýshyǵystyq respıratorlyq sındromy koronavırýsyn (TShRS-KoV/ MERS), juqtyryp alýdyń jańa tórt oqıǵasyn rastady, qaza tapqandardyń sany 19 adamǵa jetti.
Osylaısha, qazirgi ýaqytqa qaraı TShRS-KoV/ MERS koronavırýsyn juqtyrýdyń 154 oqıǵasy rastaldy. 40 paıyzǵa jýyq patsıentterdiń jasy 50-den aspaıdy. Naýqastardyń arasynda bir jasóspirim bar, dep habarlaıdy RIA Novostı.
5,2 myń adamǵa karantın rejımi belgilengen. Vırýsty Seýldegi Samsung medıtsınalyq ortalyǵynyń jedel járdem kóliginiń júrgizýshisi men dárigeri juqtyryp alǵan, bul rette olar aýrýdyń birinshi belgileriniń paıda bolýyna qaramastan, jumystaryn toqtatpaǵan. Karantın belgilengen adamdardyń arasynda 20-30 sheteldik azamat bar.
Taıaýda Ońtústik Koreıa densaýlyq saqtaý mınıstrliginiń ókilderi vırýstyń órshýi osy aıdyń sońyna qaraı aıaqtalýy tıis ekenin málimdedi.
Taıaýshyǵystyq respıratorlyq sındrom (Middle East Respiratory Syndrome, MERS) - Betacoronavirus tekti vırýstyń jańa túri týdyrǵan tynys alý músheleriniń qabynyp aýrýy. Alǵash bul aýrýdy juqtyrý jaǵdaıy 2012 jyly Saýd Arabııasynda tirkeldi. Erte kezeńderi erekshe belgilersiz ótedi. Ázirge bul dertke qarsy vaktsına da, dárilik zattar da bolmaýda. 2015 jylǵy 12 maýsymdaǵy jaǵdaı boıynsha aýrýdy 1289 adam juqtyrǵan, onyń 455-i ólimmen aıaqtalǵan.
