Ońtústik Koreıada maska kımeı júrgender 90 dollar aıyppul tóleıdi
SEÝL. QazAqparat – Koronavırýs ınfektsııasymen kúres júrgizýdiń joǵary baǵasyn alǵan Ońtústik Koreıada qoǵamdyq jerlerde maska taqpaǵan adamdar endi 100 000 vona nemese 90 dollar kóleminde aıyppul tóleıdi, dep habarlaıdy QazAqparat Yonhap agenttigine silteme jasap.
Jańa talap 13 qarashadan bastap engiziledi. Bul eń aldymen maska taqpaýdy tańdaǵan nemese ony durys taqpaǵandarǵa qatysty bolmaq. Maskany mindetti túrde taǵýdan 14 jastan kishi balalar men maskany ózdiginen taǵa almaıtyn densaýlyǵynda problemalary bar adamdar bosatylǵan.
Sondaı-aq, keıbir jaǵdaıda, dálirek aıtqanda tamaq nemese sý ishý kezinde, basseın nemese haýyz ishinde júrgende, sondaı-aq ıdentıfıkatsııa kezinde maska rejımin saqtaý mindetti emes ekeni aıtyldy.
Saıabaq, velosıped tebý jáne taýǵa órmeleý kezinde 2 metr qashyqtyqtyń saqtalýy jaǵdaıynda maska taǵý mindetti emes.
