Ońtústik Koreıada qurylystaǵy órt qurbandarynyń sany 36-ǵa jetti
INChHON. YONHAP-QazAqparat – Ońtústik Koreıanyń Ichhon qalasynda qurylys alańyndaǵy órt qurbandarynyń sany 36 adamǵa jetti, dep habarlaıdy «QazAqparat» HAA tilshisi «Yonhap» agenttigine silteme jasap.
Qaza tapqandar sany budan da artýy múmkin. Sebebi órt shyqqan ýaqytta qurylys alańynda bolǵan shamamen 78 adamnyń basym bóliginiń qaıda ekeni belgisiz.
Budan bólek, oqıǵa saldarynan 10 jumysshy túrli deńgeıde jaraqat alǵan.
Órt sóndirýshilerdiń aıtýynsha, Seýlden ońtústik-shyǵysqa qaraı 80 shaqyrym qashyqtyqta ornalasqan Inchhondaǵy órt jergilikti ýaqytpen 13:32-de bastalǵan. Qutqarýshylar órtti tek 18:42-de ǵana sóndire alǵan.
Jergilikti bıliktiń paıymynsha, órt oqshaýlaý jumystary úshin paıdalanylatyn janǵysh hımııalyq zat - ýretanmen jumys isteý kezinde jáne qurylys alańynyń jertólesinde júk lıftin ornatý barysynda bolǵan jarylystan keıin tutandy.
«Órt óte jyldam taraǵan jáne qurbandardyń evakýatsııalanýǵa múmkindikteri bolmaǵan», - dep málim etti órt sóndirýshiler.
Prezıdent Mýn Chje In Ońtústik Koreıa úkimetine barlyq qoljetimdi resýrstardy mobıldep, izdeý-qutqarý jumystaryn júrgizýdi buıyrdy.
