Ońtústik Koreıada qurylys alańyndaǵy órtten 38 adam qaza tapty
INChHON. RENHAP. QazAqparat – Ońtústik Koreıanyń Inchhon qalasynda qutqarýshylar qurylys alańynda bolǵan órttiń qurbandaryn izdep jatyr. Bul týraly Renhap agenttigine silteme jasap QazAqparat habarlaıdy.
Órt saldarynan 38 adam qaza bolyp, 10 adam túrli dárejede jaraqat alǵan. Órt sóndirýshilerdiń aıtýynsha, sársenbi kúni kúndiz Seýlden ońtústik-shyǵysqa qaraı 50 shaqyrym jerde ornalasqan Inchhon qalasynda salynyp jatqan tórtqabatty ǵımarat órtene bastaǵan. Jalyn bes saǵattan soń sóndirildi. Jergilikti bılik órtke qurylys jumystary kezinde ýretan jarylýy sebep bolǵan dep sanaıdy.
Kóz jumǵan 38 adamnyń kóbi - qurylysshylar. Beısenbi kúni tańerteńgi jaǵdaı boıynsha, jaraqat alǵan segiz adam aýyr halde jatyr, eki adam jeńil jaraqat alǵan.
Eske sala ketsek, Inchhonda álemde DRAM chıptaryn shyǵarý boıynsha ekinshi orynda turǵan SK hynix Inc. kompanııasy, sondaı-aq bólshek saýdanyń kóptegen qoımalary ornalasqan.
Іzdeý-qutqarý jumystary áli júrip jatyr.
Polıtsııa, órt kúzeti organdary jáne Ulttyq sot-medıtsınalyq qyzmeti órttiń shyǵý sebebin anyqtaý úshin birlesken tergeý bastaýdy josparlaýda.
Bılik denesi qatty kúıip, qaza bolǵan toǵyz adamnyń kim ekenin anyqtaý jumysyn bastap ketti.
Adamdardyń aty-jónin anyqtaý protsesi tolyq aıaqtalǵan soń tótenshe jaǵdaı kezinde kómek kórsetetin qalalyq top órt qurbandaryn eske alý qurmetine memorıaldyq eskertkish ornatpaq.
