Ońtústik Koreıada quny 22,9 mln dollarlyq esirtki tárkilendi, 26 kontrabandashy ustaldy

SEÝL. YONHAP-QazAqparat – Ońtústik-Shyǵys Azııada tyıym salynǵan esirtkini kontrabandalyq jolmen elge taratty dep aıyptalǵan 26 adam ustaldy, dep habarlaıdy QazAqparat YONHAP aqparat agenttigine silteme jasap.

Polıtsııa sonda-aq esirtki saýdalaýshylardan esirtki satyp alǵan 45 adamdy ustady. Kúdikke ilingen 71 adamnyń 22-si resmı túrde qamaýǵa alynǵan.

Kontrabanda dılerleri ótken jyldyń mamyry men tamyz aıynyń arasynda Ońtústik-Shyǵys Azııa elderinen Ońtústik Koreıaǵa metamfetamın, sıntetıkalyq kannabıoıdter jáne esirtkiniń basqa túrlerin jetkizgeni anyqtalǵan. Esirtki tasymaldaýshylary olardy elge keden arqyly ótkende kólik quraldary komponentteriniń ishine jasyryp kirgizgen.

Olar esirtkini ádette búkil el, sonyń ishinde Seýl, Inchhon jáne Kengı men Chhýnchhon provıntsııalarynda adam aıaǵy baspaıtyn jerlerde jasyrǵan. Polıtsııanyń aqparatynsha, satyp alýshylarǵa olardy qaıdan taba alatyny týraly aqparatty áleýmettik jeli arqyly berip otyrǵan.

Polıtsııa sondaı-aq quny 27 mıllıard vonaǵa jýyq (22,9 mıllıon AQSh dollary) esirtkini tárkiledi.