Ońtústik Koreıada qulaǵan úı 17 jolaýshy mingen avtobýsty basyp qaldy
KVAŃDJÝ. QazAqparat – Ońtústik Koreıanyń ońtústigindegi Kvańdjý qalasynda qulaǵan bes qabatty ǵımarattyń jolaýshylar avtobýsyn basyp qalýy saldarynan kem degende toǵyz adam kóz jumdy, segiz adam jaraqattandy, dep habarlaıdy QazAqparat BBC agenttigine silteme jasap.
Ulttyq órtten saqtaý qyzmetiniń dereginshe, ishinde 17 jolaýshysy bar avtobýs buzýǵa uıǵarylǵan ǵımarattyń tap qasyna toqtaǵan kezde ol qulaǵan.
Qazir qaıǵyly oqıǵa ornynda órt sóndirýshiler úıindilerdiń astynda aman qalýy múmkin adamdardy qutqarý jumystaryn júrgizýde. Ǵımarattyń qulaý sebepteri týraly áli aıtylmady.
Órt sóndirý qyzmeti ókiliniń sózinshe, onda bolǵan barlyq jumysshylar aldyn ala evakýatsııalanǵan.
Qulaǵan ǵımaratqa qarama-qarsy ornalasqan dúken ıesiniń aıtýynsha, bul oqıǵa jer silkinisine uqsaǵan.
«Men joldy kóre almaı qaldym – bárin tuman basyp qalǵandaı boldy, - dedi ol jýrnalısterge. – Keıin men syrtqy kameralardyń jazbasynan ǵımarattyń avtobýsqa qulaǵanyn kórdim».
