Ońtústik Koreıada koronavırýsty juqtyrýdyń 600 oqıǵasy tirkeldi
SEÝL. RENHAP – QazAqparat – Seısenbi kúni Ońtústik Koreıada koronavırýsty juqtyrýdyń taǵy 600 jaǵdaıy tirkeldi. Osylaısha elde aýrýǵa shaldyqqandardyń sany 4812 adamǵa jetti, dep habarlaıdy QazAqparat Yonhap-qa silteme jasap.
Sońǵy derekterge qaraǵanda, vırýstan Ońtústik Koreıada 28 adam kóz jumǵan.
Elde aýrýdy juqtyrýdyń 60 paıyzǵa jýyq oqıǵasy Tegý qalasyndaǵy Sınchhondjı (Shincheonji) dinı sektasynyń múshelerimen baılanysty bolyp otyr. Tegý – Ońtústik Koreıadaǵy 2,5 mıllıonǵa jýyq turǵyny bar iri qala.
Eldiń Ádilet mınıstrliginiń málimetinshe, bul dinı sektanyń birneshe múshesi ótken aptada Qytaıda koronavırýs shyqqan qala Ýhanda bolǵan.
Koreıanyń aýrýlardy qadaǵalaý jáne aldyn alý ortalyǵynyń málimeti boıynsha, elde indet juqtyrýdyń 519 jańa oqıǵasy Tegý qalasynda, jáne taǵy 61-i – oǵan kórshiles Soltústik Kensando provıntsııasynda tirkeldi.
Seýl qalasynda koronavırýsty juqtyrýdyń taǵy jeti oqıǵasy tirkelgen.
Ońtústikkoreıalyq sarapshylar elde koronavırýsty juqtyrýdyń rastalǵan oqıǵalary aldaǵy kúnderi ósetinin boljap otyr. Densaýlyq saqtaý organdary Tegý qalasyndaǵy Isa Sınchhondjı shirkeýiniń (Shincheonji Church of Jesus) 210 myńnan astam múshesin tekserýge kiristi.
Buǵan deıin habarlanǵandaı, Ońtústik Koreıadaǵy qazaqstandyqtardy koronavırýs saldarynan konsýldyq esepke turýdy surap jatyr.
