Ońtústik Koreıada koronavırýstan qaıtys bolǵandar sany 7 adamǵa jetti
SEÝL. RENHAP – QazAqparat – Ońtústik Koreıada jańa koronavırýstan jetinshi adam qaza tapty, taǵy 161 adam indet juqtyrdy, dep habarlaıdy Renhap.
Osylaısha, elde jalpy dertke shaldyqqandar sany 763 boldy
Densaýlyq saqtaý organdary ókilderiniń aıtýynsha, Chhonda ońtústik-shyǵys aýmaǵyndaǵy emhanaǵa barǵan 62 jastaǵy er azamat jeksenbi kúni koronavırýstan ómirden ótti.
Qazirgi ýaqytta Qytaıdan kelgen indet jeti adamnyń ómirin qıdy.
Bılik ókilderi vırýs taralyp jatqan eki negizgi oshaqty atady, olar – ońtústik-shyǵystaǵy Tegý qalasyndaǵy dinı sekta men kórshiles Chhonodaǵy emhana. Eldegi dertke shaldyqqandardyń jartysynan kóbi osy aýmaqta tirkelgen.
Vırýs juqtyrǵan jańa 161 adamnyń 142-i Seýlden ońtústik-shyǵysqa qaraı 300 km qashyqtyqta ornalasqan Tegý qalasy men kórshiles Soltústik Kensanda anyqtaldy. Taǵy úsh oqıǵa Seýlde tirkeldi, delingen Koreı aýrýlardy baqylaý jáne aldyn alý ortalyǵynyń málimdemesinde.
Jeksenbi kúni Ońtústik Koreıa vırýsty eskertý dárejesin eń joǵarǵy – «qyzylǵa» deıin kóterdi. Bul 2009 jyly H1N1shoshqa tumaýy taralǵan ýaqyttan bergi alǵashqy qaýip jaǵdaıy.
Joǵarǵy dáreje bılik ókilderine mektepterdi ýaqytsha jabýǵa, Ońtústik Koreıadan shyǵatyn jáne keletin reısterdiń sanyn qysqartýǵa múmkindik beredi.
Koronavırýstyń taralyp ketýin boldyrmas úshin Bilim mınıstrligi barlyq balabaqshalar men mektepterge jańa semestrdiń bastalýyn bir aptaǵa shegere turýdy tapsyrdy.
