Ońtústik Koreıada koronavırýs juqtyrǵandar sany 145-ke jetti
ASTANA. QazAqparat - Ońtústik Koreıa Densaýlyq mınıstrligi taıaý shyǵys respıratorlyq sındromy (MERS) koronavırýsyn taǵy jeti adam juqtyrǵanyn málimdedi, dep habarlady RBK Reuters-ǵa silteme jasap.
Elde vırýsty juqtyrǵandar sany 145-ke jetti. Ońtústik Koreıada MERS-ten 14 adam kóz jumdy.
MERS koronavırýsynyń bastapqy kezeńde erekshe belgileri baıqalmaıdy. Onyń týyndaý, taralý tetigi az zerttelgen. Dertti emdeýge arnalǵan dári ázirge jasalǵan joq.
Budan buryn Dúnıejúzilik densaýlyq saqtaý uıymy 16 maýsymǵa vırýstyń taralýyna baılanysty shuǵyl kezdesý taǵaıyndady. DDSU ókilderi koronavırýs juqtyrǵandar sanynyń artýy asa kúrdeli jaǵdaı ekenin, ári juqtyrýshylar sany arta túsýi múmkin ekenin málimdedi.
