Ońtústik Koreıada koronavırýs juqtyrǵandar sany 1000-ǵa jýyqtady
SEÝL. QazAqparat – Dúısenbi kúni Ońtústik Koreıa úkimeti koronavırýs juqtyrǵandar sanynyń rekordtyq deńgeıge jetkenin jarııalady. Bul týraly QazAqparat Renhap-qa silteme jasap habarlaıdy.
Budan buryn habarlanǵandaı, indettiń oshaǵy ońtústik-shyǵystaǵy Tegý qalasynda ornalasqan. Densaýlyq saqtaý ókilderi vırýstyń elde taralmaýyn toqtatý úshin bar kúshin salýda.
231 vırýs juqtyrý jaǵdaıy tirkeldi. Ońtústik Koreıada koronavırýs juqtyrǵandardyń jalpy sany – 833. Buǵan qosa, Tegý qalasyna jaqyn ornalasqan Chhondo shtatynda aýrýhanaǵa barǵan 62 jastaǵy er adam kóz jumdy. Bul – eldegi koronavırýstan mert bolǵan jetinshi adam.
Dúısenbi turǵyndar sany 2,5 mln jýyq adamdy quraıtyn Tegý qalasynda vırýs juqtyrǵandar sany birden ósti – 196-dan 483 adamǵa jetti. Qala turǵyndaryna úılerinen shyqpaýǵa keńes berilip jatyr.
Aýrýdyń taralǵan negizgi eki oshaǵy – dinı sekta ornalasqan Tegý qalasy men kórshi Chhondo shtaty.
Bul óńirderde vırýs juqtyrǵandar sany eldegi koronavırýsqa shaldyqqandardyń úshten birin qurap otyr. Aýrý juqtyrǵandardyń 60 protsenti Tegýdegi Sınchhondjıde ornalasqan shirkeýdegi sıynýshylarmen, 15 protsenti – Chhondodaǵy Daen aýrýhanasymen baılanysty.
Vırýs juqtyrǵan adamdar sanynyń artýy Koreıa ekonomıkasynyń tómendeýine ákelip soqtyryp jatyr. Prezıdent Mýn Chje In sheneýnikterdi koronavırýstyń ekonomıkaǵa yqpalyn jeńildetý úshin qosymsha bıýdjettiń qajettiligi týraly máseleni qarastyrýdy bastaýǵa shaqyrdy.
